Լաուրա Սարգսյան, Sputnik.
Երևանում մեկ ամիս առաջ վայրէջք կատարեց Հոնկոնգից ժամանած ինքնաթիռը` միջազգային օլիմպիադայի հայ մասնակիցներով։ Միակը, որը ոսկե մեդալ բերեց երկրին, ֆիզմաթ դպրոցի սան, ֆիզիկա առարկայից միջազգային օլիմպիադայի հաղթող Էդգար Վարդանյանն էր։
«Ամենադժվարը` հուզմունքդ հաղթահարելն ու խնդրի վրա կենտրոնանալն է։ Հաջորդ մասնակիցներին հորդորում եմ օլիմպիադայից առաջ ոչ մի բանի մասին չմտածել և հավատալ սեփական ուժերին», — Sputnik Արմենիայի թղթակցի հետ զրույցում ասաց Էդգարը։
Այն մասին, որ ֆիզիկան իր ապագան է, նա հասկացել է երեք տարի առաջ, երբ ուժերն է փորձել այլ առարկաներից։ Չնայած մեծ ծանրաբեռնվածությանն ու զբաղվածությանը, Էդգարը ժամանակ գտնում է ընկերների հետ լինելու և այլ հետաքրքրությունների համար։
«Ես ընդունվեցի ԵՊՀ և զուգահեռաբար Մոսկվայի ֆիզիկատեխնիկական համալսարան, բայց, քանի որ բանակից տարեկետումը տարածվում է միայն տեղի բուհերի վրա, ստիպված Հայաստանում մնացի», — նշեց Էդգարը։
Նա դեռ չի որոշել, արդյո՞ք կշարունակի ուսումը Հայաստանում, թե ոչ, սակայն հստակ գիտի, որ շարունակելու է զբաղվել գիտական գործունեությամբ։
«Օլիմպիադայում հաղթանակը ևս մի փոքրիկ ձեռքբերում է գիտական աշխարհի ճանապարհին։ Ես դեռ շատ անփորձ եմ նոր տեսություն առաջ քաշելու համար», — համեստորեն նշեց Էդգարը։
Նույն տեսակետն ունի նաև մաթեմատիկա առարկայից միջազգային օլիմպիադայի բրոնզե մրցանակակիր Սերգեյ Ներսեսյանը։ Նրա խոսքով, մաթեմատիկայում վաղուց ամեն ինչ հաշվարկված է, և նա չի պատկերացնում, թե ինչ նոր բան կարող է բացահայտել։
«Ես գոհ չեմ օլիմպիադայում իմ արդյունքից և կարծում եմ, ինքս եմ մեղավոր, որ այսօր բրոնզ ունեմ։ Հուզմունքն այստեղ կապ չունի, 2016 թվականի օլիմպիադան ավելի հեշտ էր, քան անցյալ տարվանը։ Ինքս լավ չեմ կատարել իմ առջև դրված խնդիրը», — խոստովանեց Սերգեյը։
Ի տարբերություն Էդգարի, նա մանկուց նախապատվությունը տվել է մաթեմատիկային և արդեն այն ժամանակ գիտեր, որ իր ապագան ճշգրիտ գիտությունն է։
Ազատ ժամանակ Սերգեյը ֆուտբոլ է խաղում, կարդում է, ժամանակ անցկացնում ընտանիքի և ընկերների հետ, սակայն այսօր դժվար է պատկերացնում, որտեղ կլինի տասը տարի հետո և որ բուհը կընդունվի դպրոցն ավարտելուց հետո։
2016 թվականի դպրոցականների միջազգային օլիմպիադայում Հայաստանը 15 մեդալ նվաճեց. 1 ոսկի, 3 արծաթ և 11 բրոնզ` դառնալով առաջատարը տարածաշրջանի երկրների շարքում։
Հայաստանի դպրոցականները մրցում էին տարբեր երկրներից ժամանած դպրոցականների հետ մաթեմատիկա, ֆիզիկա, կենսաբանություն, քիմիա, ինֆորմատիկա և աշխարհագրություն առարկաներից։
Հոկտեմբերին նրանց նոր փուլ է սպասվում` մասնակցություն աստղագիտության միջազգային օլիմպիադային։
