ԵՐԵՎԱՆ, 23 օգոստոսի — Sputnik. Դպրոցից համակարգչային տեխնիկա գողանալուց առաջ կողոպտիչները կոկորդիլոսներ են նետել շենքի տարածք։ Այս մասին հայտնում է ՌԻԱ Նովոստին` հղում անելով Ռոյթերս գործակալությանը։
Դեպքը տեղի է ունեցել Ավստրալիայի հյուսիսում գտնվող Տամինմին քոլեջում։ Ոստիկանությունը հայտնում է, որ դրանից առաջ նրանք կոտրած պատուհանից երեք կոկորդիլոս են բաց թողել։
Տեսանկարահանող սարքերի տեսագրությունից երևում է, որ տղամարդիկ համակարգչի մոնիտոր են գողացել, այնուհետև թաքնվել դեպքի վայրից։
Ավստրալիայի ազգային արգելոցների և այգիների վարչության տեղեկատվության համաձայն`կոկորդիլոսներին ամենայն հավանականությամբ վերցրել են մոտակա ֆերմայից։ Նշվում է, որ նրանք շատ վատ վիճակում են եղել և քիչ է հավանականությունը, որ կենդանիները կապրեն։
«Միայն ոսկորներն ու կաշին էր մնացել, նրանց վրա գրեթե միս չկար, շատ հանգիստ էին, և կոկորդիլոսներին բռնելը հեշտ էր», — հայտնում է վարչության ներկայացուցիչ Լյուկ Մակլարանը։
