ԵՐԵՎԱՆ, 22 օգոստոսի-Sputnik. Ռիո դե Ժանեյրոյի օլիմպիական խաղերի փոխչեմպիոն, Ռուսաստանցի բռնցքամարտիկ Միշա Ալոյանը հայտարարեց, որ չնայած իր տարիքին` չի պատրաստվում հանձնվել ու կպայքարի օլիմպիական ոսկու համար։
Կիրակի Ալոյանը, ով օգոստոսի 23-ին կդառնա 28 տարեկան, Ռիոյի օլիմպիադայում արծաթե մեդալ նվաճեց` եզրափակչում պարտվելով ուզբեկ Շախոբիդին Զոիրովին: 2012թ. Լոնդոնի օլիմպիադայում Ալոյանը բրոնզ էր շահել։
«Այստեղ հոգեբանական առումով ավելի հեշտ էր, քան Լոնդոնում։ Ես մեծ փորձ ունեմ։ Ես ավելի լավ մարզավիճակում էի, քան այն ժամանակ։ Այդ պատճառով մի քիչ անհարմար եմ զգում։ Հուսով էի և ցանկանում էի արդարացնել իմ մարզիչի հույսերը։ Բայց ես շնորհակալ եմ աստծուն, որ նա ինձ արծաթ նվաճելու հնարավորություն տվեց։ Չեմ պատրաստվում հանձնվել։ Ես ընդամենը 28 տարեկան եմ», — պատասխանեց Ալոյանը լրագրողների այն հարցին, թե պայքարելու՞ է արդյոք ոսկե մեդալի համար։
Նա նշեց, որ կվերադառնա տուն, «ամեն ինչ կհարթվի, հետո կտեսնենք»։
