ԵՐԵՎԱՆ, 21 օգոստոսի-Sputnik. Վարդան Զիլֆուղարյանը 10 տարվա աշխատանքային փորձ ուներ, նկարահանել է բազմաթիվ ֆիլմեր Երևանում և Մոսկվայում, աչքի ընկել տաղանդով ու զուսպ բնավորությամբ։
2014 թվականի նոյեմբերին, Մոսկվայում հերթական ֆիլմը նկարահանելիս, վատ է զգում։ Շտապօգնության մեքենայով տանում են հիվանդանոց։ Մեկ ամիս տևած հետազոտությունը պարզում է, որ նա հիվանդ է արյան քաղծկեղով։
Վարդանի կյանքում դաժան ապրումների ու տևական պայքարի ծանր շրջան է սկսվում։ Մոսկվայում և Գերմանիայում բժիշկներն ասում են, որ ընդամենը երկու ամսվա կյանք է մնացել նրան, քանի որ քիմիոթերապիան արդյունք չի տալիս։
Ճակատագիը, սակայն, մի պահ հույսի դուռ է բացում։ Պարզվում է, որ ԱՄՆ-ում կա մի ինստիտուտ, որտեղ բուժում են այդպիսի ծանր հիվանդությունները։
Վարդանի քույրը տեղեկանում է, որ կարող է հանդիսանալ ոսկրածուծի դոնոր եղբոր համար, սակայն արյան փոխպատվաստումը շատ թանկ է։
Դրամահավաք են կազմակերպում, բայց ԱՄՆ-ում կես միլիոն դոլար արժեցող արյան փոխպատվաստումը կատարում են անվճար։
Մերթ հույսի, մերթ հուսահատության հարատև թվացող այդ ընթացքում ծնվում է Վարդանի դուստրը՝ Մարիաննան, որը դառնում է նրան կայնքին կապող և ուժ տվող փրկօղակ։
Վարդան Զիլֆուղարյանի սկզբունքն էր՝ երբեք չհանձնվել։ Նա խիզախորեն պայքարեց ծանր հիվանդության դեմ, սակայն տեղի ունեցավ ի վերուստ կանխորոշվածը…
Sputnik Արմենիան ցավակցում է մեր գործընկերոջ հարազատներին՝ անժամանակ, ծանր կորստի կապակցությամբ։
