ԵՐԵՎԱՆ, 21 օգոստոսի — Sputnik. Մոսկվայի շրջանի Սոլնեչնոգորսկ քաղաքում տաքսու վարորդ Արա Ջանասլանյանը փրկել է այրվող ավտոմեքենայի մեջ գտնվող 5-ամյա երեխային, հայտնում է Մոսկովսկի «Կոմսոմոլեց» թերթը:
Երեխայի ծնողները նոր բնակարան էին տեղափոխում իրերը և երեխային ավտոմեքենայի մեջ մենակ էին թողել: Նախնական վարկածի համաձայն, երեխան սկսել է կրակայրիչի հետ խաղալ, ինչն էլ հրդեհի պատճառ է դարձել:
«Ես ավարտել էի պատվերն ու վերադառնում էի, երբ հանկարծ 12-րդ տան մոտ նկատեցի ծխի մեջ կորած «Նիվա»-ն: Մեքենայի շուրջ մարդիկ էին հավաքվել, սակայն ոչ ոք ոչ մի միջոց չէր ձեռնարկում: Նրանք ասում էին, որ ավտոմեքենայի սրահում երեխա կա: Դա լսելով, ես միանգամից նետվեցի դեպի ավտոմեքենան», — պատմում է Ջանասլանյանը:
Երեխան կուչ էր եկել և թաքնվել առջևի նստարանի տակ: Ջանասլանյանին հաջողվել է երեխային դուրս հանել, թեև ինքը ձեռքի այրվածք է ստացել: Առաջինը, ինչ ասել է երեխան. «Հայրիկիս, չասեք, թե չէ նա կբարկանա ինձ վրա»:
Երեխային առաջին և երկրորդ կարգի այրվածքներով տեղափոխել են այրվածքների կենտրոն։ Ինքը` Ջանասլանյանն իր արարքը հերոսական չի համարում:
Նա պատմել է, որ ինքն էլ ունի երկու որդի` հինգ և ութ տարեկան, որոնց միայնակ է դաստիարակում:
