ԵՐԵՎԱՆ, 20 օգոստոսի — Sputnik. Արմենուհի Մխոյան. Այն, որ հայ և ռուս ժողովուրդները նման են և միասին կիսում են պատմության շատ էջեր, նորություն չէ։ Միմյանց հետ ուս-ուսի հայ և ռուս զինվորները կռիվ են մղել ու զոհվել տնից հեռու, մեկը՝ հեռավոր ռուսական, մյուսը՝ հայկական հողում:
Ժողովուրդների դարավոր բարեկամության խորհրդանիշը համարվող Գյումրու «Պատվո բլուր» հուշահամալիրը ճակատագրեր է ամփոփում: Այստեղ ռուս-թուրքական պատերազմների ժամանակ զոհված ռուս սպաների ու զինվորների աճյուններն են ամփոփված: 160 տարի առաջ հենց նույն տարածքում գերեզմանոց է հիմնվել ու կառուցվել մատուռ:
1828, 1855 և 1877-1878 թվականներին զոհված 240 զինվորականների հիշատակին նվիրված միջոցառմամբ օգոստոսի 20-ին մեկնարկեց Հայաստանում «Ռուսական հոգևոր մշակույթի օրեր» միջոցառումը: Մինչ ծաղիկներ ու ծաղկեպսակ կդրվեին հուշահամալիրին՝ ի հիշատակ հայկական հողում ամփոփված զինվորների, հնչեցին երկու երկրների օրհներգերը, կատարվեց հիշատակի կարգ՝ ձեռամբ հայր Անդրեյի: Արարողությանը մասնակցեց նաև Սանկտ Պետերբուրգի Մետրոպոլիայի հոգևոր երգչախումը: Միջոցառմանը ներկա էին մարզային ու քաղաքային իշխանությունների ներկայացուցիչները, Հայաստանում ՌԴ արտակարգ և լիազոր դեսպան Իվան Վոլինկինը, ՀՀ-ում ՌԴ հյուպատոս Եվգենի Կոնիշևը, պաշտոնատար այլ անձինք:
Դեսպան Վոլինկինը կարևորեց հայ և ռուս ժողովուրդների դարավոր բարեկամությունը` նշելով, որ այս հուշահամալիրն այդ բարեկամության վառ ապացույցն է, և ընդգծեց, որ «Պատվո բլուր» հուշահամալիրի բացումն իրապես պատմական իրադարձություն կարելի է համարել:
«Վեց տարի առաջ` օգոստոսի 20-ին, վերաբացվեց այս հուշահամալիրը` ՌԴ և ՀՀ նախագահների մասնակցությամբ։ Այս իրադարձությունն առավել սերտացրեց հայ-ռուսական բազմադարյա բարեկամությունը: Հուշահամալիրի վերաբացումը ևս մեկ ապացույց էր, որ մեր երկու ժողովուրդները փառքով են հիշում և խնկարկում իրենց այն որդիներին, որոնք զոհվել են հանուն ազատության: Այսօր էլ` վեց տարի անց, մենք այստեղ ենք, որպեսզի վառ պահենք նրանց հիշատակը»,- նշեց դեսպանը:
Գյումրու քաղաքապետ Սամվել Բալասանյանը խորհրդանշական համարեց, որ հենց «Պատվո բլրի» մոտ են հավաքվել բոլորը, մի վայր, որտեղ ամփոփված են այն զինվորների աճյունները, ովքեր իրենց կյանքն են տվել Գյումրին պաշտպանելու համար: Նրա խոսքով` 2010 թվականին վերականգնված այս հուշակոթողն արդեն դարձել է ոչ միայն հիշատակի, այլ երկու երկրների բարեկամությունը խորհրդանշող հրաշալի կոթող։
«Ռուսական հոգևոր մշակույթի օրերը կարևոր իրադարձություն է մեր քաղաքի համար: Այս գեղեցիկ միջոցառումը ևս մեկ անգամ ապացուցում է, որ մեր երկու երկրներն իրար են կապված ոչ միայն ստրատեգիական համագործակցության, այլև ավելի խորը՝ մշակութային և հոգևոր կապով: Գյումրին մշակութային մայրաքաղաք է, և այստեղ բարձր է գնահատվում մշակույթը, հուսով եմ` «Ռուսական մշակութային օրերը» Գյումրիում կդառնան բարի ավանդույթ»,- նշեց քաղաքապետը։
Նա ընդգծեց նաև Հայաստանում ՌԴ դեսպանության, 102-րդ ռազմակայանի ղեկավարության և Գյումրու քաղաքապետարանի ջերմ համագործակցությունը։
2009թ. Շիրակի և ՌԴ Ուլյանովսկի մարզերի իշխանությունների նախաձեռնությամբ ու հայ-ռուսական բարեգործական «Պատվի գործ» կազմակերպության համատեղ ջանքերով այս տարածքում իրականացվել են բարեկարգման և վերակառուցման աշխատանքներ, կառուցվել է ռուս սպաների հիշատակը հավերժացնող հուշարձան։
