ԵՐԵՎԱՆ, 17 օգոստոսի — Sputnik. Միհրան Հարությունյանը օգոստոսի 16-ին 4։1 հաշվով հաղթեց ադրբեջանցի Չունաևին ու հաղթական քայլով անցավ նրա կողքով։
Այս կադրը խոշոր պլանով ցուցադրվեց ուղիղ եթերում, սակայն ոչ բոլորը հասկացան, թե ինչ էր ուզում ասել մարզիկն իր այդ արարքով։
2014թ. աշխարհի առաջնությունում բրոնզե մեդալի համար Չունաևը պայքարում էր հայ մարզիկ Վարշամ Բորանյանի հետ: Վարշամը կիսաեզրափակչում կտրել էր ոտքի մկանը, բայց դուրս էր եկել մրցագորգ:
Չունաևը հաղթել էր Բորանյանին, որից հետո զինվորի պատիվ տվել, ավելի ուշ հարցազրույցում հայտարարել` եթե մրցակիցդ հայ է, ապա նրա հանդեպ միայն ատելություն ու չարություն ես զգում:
Ընդամենը երկու տարի անց Միհրանը Չունաևին հաղթելով՝ պատասխանեց նրան:
Ցավոք, Ռիո-2016 —ի եզրափակիչ փուլում մրցավարները հաղթող ճանաչեցին սերբ ըմբշամարտիկին, և Միհրան Հարությունյանին բաժին հասավ արծաթե մեդալը։
