ԵՐԵՎԱՆ, 17 օգոստոսի — Sputnik. Օլիմպիական չեմպիոն դառնալ ոչ բոլորին է հաջողվում, ու ոսկե մեդալը նվաճելուց հետո գրեթե բոլորն էլ անմիջապես չեն գիտակցում, թե ինչ արդյունքի են հասել: Մինչև 98 կգ քաշային կարգում կուբացի Դանիել Լուգո Կաբրերային հաղթելուց ու չեմպիոն հռչակվելուց հետո նույն վիճակում էր Արթուր Ալեքսանյանը, որի մարզաշապիկին ապրիլյան քառօրյա պատերազմի հերոս Ռոբերտ Աբաջյանի նկարն էր պատկերված:
«Ես հիմա իրոք չեմ հասկանում թե ինչի եմ հասել: Բայց լավ է, որ գոտեմարտի ժամանակ ուղեղս չանջատվեց ու հաղթեցի: Ամեն դեպքում հպարտ եմ և ուրախ, որ կարողացա ոսկե մեդալ բերել Հայաստանին քսան տարի անց: Երջանիկ եմ, որ սառույցը ես կոտրեցի»,- ասաց Ալեքսանյանը:
Միհրան Հարությունյանի գոտեմարտի մասին խոսելիս ու Sputnik Արմենիայի թղթակցի հարցին պատասխանելով` Արթուրը նշեց.
«Միհրան ինձ համար չեմպիոն է: Եվ վստահ եմ` ամբողջ աշխարհի համար էլ չեմպիոնը Միհրանն է: Նրա հետ շատ անարդար վարվեցին: Այսօր Հայաստանը պետք է երկու ոսկե մեդալ ունենար, բայց ունեցավ մեկ ոսկե և մեկ արծաթե»:
Իսկ անդրադառնալով մարզաշապիկի վրա Ռոբերտ Աբաջյանի նկարին` օլիմպիական չեմպիոնը հուզված ասաց. «Ես վաղուց էի որոշել, որ եթե հասնեմ հաղթանակի, կրելու եմ այս նկարը: Ես իմ հաղթանակը նվիրում եմ ապրիլյան քառօրյա պատերազմի ժամանակ զոհված մեր հերոս տղաներին ու նրանց, ովքեր հիմա հսկում են մեր սահմաններին ու ապահովում մեր անդորրը»:
