ԵՐԵՎԱՆ, 17 օգոստոսի — Sputnik. Ռիո դե Ժանեյրոյի Օլիմպիադայում հունահռոմեական ոճի ըմբաշամարտի 66 կգ քաշային կարգի եզրափակչում Հայաստանը ներկայացնող Միհրան Հարությունյանը րոպեներ առաջ մրցեց սերբ Դավոր Շտեֆանեկի հետ: Մրցակիցը, անկասկած, շատ փորձառու էր` աշխարհի 2014 թվականի չեմպիոնն ու 2015 թվականի բրոնզե մեդալակիրը։
Առաջին մրցափուլում Միհրանը ոչ մի շանս չտվեց մրցակցին ու գործելով ակտիվ` կարողացավ մեկ միավոր վաստակել: Երկրորդ մրցափուլում հայ ըմբիշը կարծես չէր զիջում մրցակցին նույնիսկ ակտիվությամբ: Բայց մրցավարական գործոնը առաջ եկավ: Չգիտես որտեղից պասիվություն տվեցին Միհրանին ու մեկ միավոր շնորհեցին սերբին:
Ըմբշամարտի միջազգային ֆեդերացիայի նախագահ Նենադ Լալովիչին նվեր մատուցելու համար մրցավարները արջի ծառայություն մատուցեցին ու պարզապես խլեցին ոսկե մեդալը հայ ըմբշամարտիկից: Օլիմպիական խաղերում ուղղակի չի կարելի զրկել մարդկանց բաղձալի երազանքից նման կերպով:
Միհրան Հարությունյանը օլիմպիական մրցումների մեկնարկային գոտեմարտում բացահայտ առավելության հասավ եգիպտացի Ահմեդ Կահկի նկատմամբ: Երկրորդ գոտեմարտում հայ ըմբիշն արդեն մեծ դժվարությամբ՝ 2:1 հաշվով առավելության հասավ կորեացի Ռյու Հանսուի նկատմամբ: Կիսաեզրափակչում էլ Միհրանը գեղեցիկ ոճով պարտության մատնեց ադրբեջանցի Ռասուլ Չանաևին՝ 4:1 հաշվով:
