ԵՐԵՎԱՆ, 17 օգոստոսի — Sputnik. Sputnik.Կարծիք նախագծի շրջանակում անցկացված հարցախույզին մասնակցել են 35 տարեկան և բարձր անձինք, հետազոտությունն անցկացվել է նախկին ԽՍՀՄ-ի 11 երկրներից 9-ում։
Ռուսաստանում հարցվածների 64%-ը Խորհրդային Միության օրոք կյանքի մակարդակն ավելի բարձր են գնահատել։ Ուկրաինայում այս պնդման հետ համաձայնել է հարցվածների 60%-ը, իսկ ամենաբարձր ցուցանիշը գրանցվել է Հայաստանում (71%) և Ադրբեջանում (69%)։ Հարցվածների այն մասը, որը չի հիշում, թե ինչպիսին էր կյանքը Խորհրդային Միության ժամանակ (դրանք 18-24 տարեկան անձինք են), կարծում են, որ կյանքը բարելավվել է ԽՍՀՄ փլուզումից հետո։ Ռուսաստանում նման կարծիք է հայտնել հարցվածների 65%-ը։
Տվյալներն ամփոփվել են Հանրային կարծիքի ուսումնասիրման համառուսական կենտրոնի, M-Vector, Ipsos, Expert Fikri և Qafqaz հետազոտական ընկերությունների` ԽՍՀՄ-ի նախկին 11 երկրներում անցկացրած հարցումների հիման վրա` Sputnik լրատվական գործակալության և ռադիոյի պատվերով։
Գրեթե բոլոր երկրներում 35 տարեկանից բարձր քաղաքացիները կարծում են, որ մարդիկ ԽՍՀՄ-ում ավելի լավ էին ապրում, քան փլուզումից հետո։ Հայաստանում նրանց թիվը կազմում է 71% (դեմ` 23%), Ադրբեջանում 69% (դեմ` 29%), Ռուսաստանում 64% (դեմ` 27%), Ղազախստանում 61% (դեմ` 27%), Ուկրաինայում 60% (դեմ` 23%), Ղրղըզստանում 60% (դեմ` 30%), Բելառուսում 53% (դեմ` 28%), Վրաստանում 51% (դեմ` 46%)։ Եվ միայն Տաջիկստանի (39% կողմ` 55%-ի դիմաց) և Ուզբեկստանի (4% կողմ` 91%-ի դիմաց) 35 տարեկանից բարձր բնակիչներն են կարծում, որ ԽՍՀՄ-ի փլուզումից հետո կյանքն ավելի բարեկեցիկ է դարձել։
25 տարեկանից ցածր երիտասարդները, որոնք ծնվել են ԽՍՀՄ-ի փլուզումից հետ, կարծում են, որ կյանքը հիմա ավելի բարեկեցիկ է։ Հայաստանում նրանց թիվը կազմում է 48% (դեմ` 47%), Ղրղըզստանում 48% (դեմ` 37%), Ղազախստանում 56% (դեմ 35%), Բելառուսում 57% (դեմ` 34%), Վրաստանում 79% (դեմ` 20%), Ուկրաինայում 39% (դեմ` 18%), Ռուսաստանում 65% (դեմ` 17%), Ադրբեջանում 68% (դեմ` 14%), Տաջիկստանում 84% (դեմ` 13%), Ուզբեկստանում 89% (դեմ` 5%):
Ռուսաստանում հարցումն անցկացրել է Հանրային կարծիքի ուսումնասիրման համառուսական կենտրոնը, Ղրղըզստանում և Տաջիկստանում` M-Vector ընկերությունը, ինչպես նաև` GFK Ղազախստան, Moreinfo, Qafqaz ընկերությունները։ Հետազոտությունն անցկացվել է 2016 թվականի հուլիսի 4-ից օգոստոսի 15-ն ընկած ժամանակահատվածում նախկին ԽՍՀՄ 11 երկրներում։ Հարցմանն ընդհանուր առմամբ մասնակցել է 12645 մարդ, 1000-ական մարդ` Հայաստանում, Ադրբեջանում, Բելառուսում, Մոլդովայում, Վրաստանում, Ղազախստանում, Ղրղըզստանում, Տաջիկստանում, 1045-ը` Ուզբեկստանում, 2000-ն Ուկրաինայում և 1600-ը` Ռուսաստանում։ Ընտրանքն իրականացվել է ըստ հարցվածների սեռի, տարիքի և բնակության վայրի։ Տվյալների անճշտության առավելագույն մակարդակը կազմում է ավելի քան 3,1%` 95% վստահության հավանականության դեպքում:
Հասարակական կարծիքի ուսումնասիրման միջազգային նախագիծը մեկնարկել է 2015 թվականի հունվարին։ Գործընկերն են Populus, Ifop և Forsa հայտնի հետազոտական ընկերությունները։ Sputnik.Կարծիք նախագծի շրջանակում կանոնավոր կերպով հասարակական կարծիքի հարցումներ են անցկացվում Եվրոպայի և ԱՄՆ-ի երկրներում առավել արդիական սոցիալական և քաղաքական հարցերի վերաբերյալ։
Sputnik-ը (sputniknews.com) լրատվական գործակալություն է և ռադիո` տասնյակ երկրներում մուլտիմեդիոն տեղեկատվական ներկայացուցչություններով: Sputnik-ը ներառում է ավելի քան 30 լեզվով կայքեր, անալոգային և թվային ռադիոհեռարձակում, բջջային հավելվածներ և էջեր սոցիալական կայքերում։ Sputnik-ի լուրերը շուրջօրյա ռեժիմով թողարկվում են անգլերեն, արաբերեն, իսպաներեն և չինարեն լեզուներով:
