ԵՐԵՎԱՆ, 16 օգոստոսի — Sputnik. Ռուսաստանի Պսկովի շրջանում սկսվել են ՀԱՊԿ ԱԱՀՈՒ հրամանատարաշտաբային «Փոխգործակցություն-2015» զորավարժությունները, հայտնում է ՌԻԱ Նովոստին։
Զորավարժությունների բացման արարողությունը տեղի է ունեցել Ռուսաստանի օդադեսանտային զորքերի «Ստրուգի կրասնիե» կենտրոնական զորավարժարանում։ Վարժանքները կանցկացվեն օգոստոսի 16-19-ը։
«Մենք հետաքրքիր և լայնամասշտաբ համատեղ զորավարժություններ ենք սկսում։ Վարժանքներն անցկացվում են շատ դժվար ժամանակներում, երբ աշխարհում իրավիճակը վատանալու միտում ունի։ Դուք կարող եք տեսնել, թե ինչպես են մեր պետությունների սահմաններին նոր մարտահրավերներ ձևավորվում», — իր ելույթում նշեց զորավարժությունների ղեկավար, Արևմտյան ռազմական օկրուգի զորքերի հրամանատար, գեներալ-գնդապետ Անդրեյ Կարտապոլովը։
«Մեր զորավարժությունները որևէ մեկին չեն սպառնում, սակայն դրանք ազդանշաններ են ուղղված բոլորին այն մասին, որ մեր պետությունները ուժ և կամք ունեն», — ավելացրել է նա։
Զորավարժություններին մասնակցում են Հայաստանի, Բելառուսի, Ղազախստանի, Ղրղըզստանի, Ռուսաստանի և Տաջիկստանի ԶՈՒ համակազմերը։ ՀԱՊԿ ԱԱՀՈՒ համակազմում ընդգրկված է ավելի քան 1300 մարդ, իսկ վարժանքներին ընդհանուր առմամբ մասնակցում է ավելի քան 6 հազար զինծառայող, մինչև հազար միավոր սպառազինություն, ռազմական և հատուկ տեխնիկա։
Բացի «Ստրուգի կրասնիե» կենտրոնական զորավարժարանից` «ռազմական գործողությունները», զորավարժությունների նախնական ծրագրի համաձայն, կանցկացվեն Արևմտյան ռազմական օկրուգի ևս երկու զորավարժարաններում։
