ԵՐԵՎԱՆ, 16 օգոստոսի — Sputnik. Խաղաղապահների հավանական մուտքը Ղարաբաղ դատարկ թեմա է, Sputnik Արմենիայի թղթակցի հետ զրույցում ասաց Քաղաքական և ռազմական վերլուծության ռուսական կենտրոնի տնօրենի տեղակալ Ալեքսանդր Խրամչիխինը։
«Ոչ մի խաղաղապահ որևէ տեղ երբեք չի լինելու։ Խաղաղապահներն ընդհանրապես միֆ է։ Խաղաղապահների մուտքը հնարավոր է միայն երկու կողմերի համատեղ խնդրանքի դեպքում, ընդ որում` գիտակցված խնդրանքի, երբ կողմերն անձամբ այլևս կռվել չեն ցանկանում», — ասել է Խրամչիխինը։
Նրա կարծիքով` քանի որ ո'չ Հայաստանը, ո'չ Ադրբեջանը ոչ մի խաղաղապահ չեն խնդրել, դրանք չեն էլ գա։
«Սա միանգամայն դատարկ թեմա է», — ասել է Խրամչիխինը։
Հարցին, թե արդյո՞ք Հայաստանին 200 մլն դոլարի ռուսական վարկի շրջանակում սպառազինության մատակարարումը Ադրբեջանի հետ հավասարությունը պահպանելու համար է, Խրամչիխինը վերապահորեն է պատասխանել։
«Ինձ հայտնի չէ, թե Հայաստանը կոնկրետ ինչ զենք է ձեռք բերում։ Դժվար նա կարողանա նույնքան սպառազինություն ձեռք բերել, որքան Ադրբեջանը ձեռք է բերել Ռուսաստանից։ Մյուս կողմից` Ռուսաստանը ՀԱՊԿ-ի շրջանակներում կատարելու է իր պարտավորությունները։ Սա կոմպենսացնում է այն, որ Հայաստանն ավելի քիչ զենք է գնում, քան Ադրբեջանը», — ասել է Խրամչիխինը։
Ինչ վերաբերում է Ռուսաստանի և Հայաստանի ԶՈՒ զորքերի միավորված խմբավորման հավանական ստեղծմանը, ապա, նրա կարծիքով, դժվար է ասել, թե ինչպես է այն իրականացվելու գործնականում։
Ավելի վաղ ՌԴ պաշտպանության փոխնախարար Անատոլի Անտոնովը հայտնել էր, որ Ռուսաստանն ու Հայաստանը մոտ են զորքերի միավորված խմբավորման ստեղծման մասին համաձայնագրի ստորագրմանը։
«Փաստացի դա ինչ-որ միասնական հրամանատարություն է, ակնհայտորեն` Հայաստանի բոլոր զինված ուժերի, համենայն դեպս, երկրի տարածքում ռուսական կայանի նկատմամբ։ Գաղափարն այն է, որ լինեն որոշակի զինված միասնական ուժեր», — ասել է Խրամչիխինը։
Սակայն դժվար է ասել, թե ինչ է լինելու Հայաստանի պարագայում, նրա կարծիքով, վաղուց նման խմբավորում ստեղծվում է Բելառուսի հետ, սակայն գործնականում այն չկա։
Գնահատելով ՌԴ պաշտպանության նախարար Սերգեյ Շոյգուի այցերը Բաքու և Երևան` Խրամչիխինը նշել է, որ դրանք նպատակ ունեին ցույց տալու, որ Ռուսաստանը որոշակի չեզոք դիրք է գրավել, լավ հարաբերություններ է պահպանում Հայաստանի և Ադրբեջանի հետ` որևէ մեկին նախապատվություն չտալով։
