ԵՐԵՎԱՆ, 16 օգոստոսի — Sputnik. Վրաստանի Փոթի քաղաքում կայացած «11 th Poti International Chess» շախմատային փառատոնից հարուստ ավարով են վերադարձել մայրաքաղաքի Ավան վարչական շրջանի շախմատի մանկապատանեկան մարզադպրոցի սաներ Գայանե Բալասանյանը, Անի Մարգարյանն ու Էդգար Հայրապետյանը: Շվեյցարական մրցակարգով անցկացված մրցաշարի իննական պարտիաներում, անհատական պայքարում նրանք երեքն էլ նվաճել են հաղթողի կոչումը:
Ինչպես հայտնում է Երևանի քաղաքապետարանի մամուլի ծառայությունը, հայ երեխաները տարբեր մրցափուլերում հաղթել են նաև ադրբեջանցի իրենց հասակակիցներին:
Փոքրիկ չեմպիոններին հյուրընկալել ու շնորհավորել են Ավան վարչական շրջանի ղեկավար Մանվել Ջավադյանն ու ՀՀ ԱԺ պատգամավոր Ռոբերտ Սարգսյանը: Ավանցի պատանիները նաև պարգևատրվել են շնորհակալագրերով:
