ԵՐԵՎԱՆ, 15 օգոստոսի — Sputnik. Արթուր Ալեքսանյանը հանդես է գալու 98կգ քաշային կարգում, իսկ Միհրան Հարությունյանը` 66կգ քաշային կարգում:
Արդեն կայացել է այս քաշային կարգերի վիճակահանությունը: Արթուր Ալեքսանյանը 1/8 եզրափակչում իր առաջին գոտեմարտն է անցկացնելու օլիմպիական մրցաշարում: Հայ ըմբիշի մրցակիցն է լինելու իտալացի Դիագորո Տիմոնսինին: Հաղթելու դեպքում Ալեքսանյանը մրցելու է եգիպտացի Համզա Յուսուֆ Աբդելվահաբ և ռումինացի Ալեքսուս Չիարարիու զույգի հաղթողի հետ:
Միհրան Հարությունյանը նույնպես սկսելու է իր ելույթները 1/8 եզրափակչից: Հայ ըմբիշի մրցակիցն է լինելու եգիպտացի Աբդել Սալահ Կանկը: Հաղթանակի դեպքում հայ ըմբշամարտիկի մրցակիցն է լինելու Հանսյու Ռյու և Տամաշ Լորինչ զույգի հաղթողը:
Հավելենք, որ 98կգ քաշային կարգում հաղթողի հիմնական հավակնորդ Ալեքսանյանի հիմնական մրցակիցներն են լինելու իրանցի Ղասեմ Ռեզային որի հետ գոտեմարտը ըստ վիճակահանության հնարավոր է միայն եզրափակչում, և Ռուսաստանը ներկայացնող Իսլամ Մագոմեդովը, որի հետ գոտեմարտը հնարավոր է արդեն կիսաեզրափակչում:
Միհրան Հարությունյանի մրցակիցներն էլ բավականին ուժեղ են մինչև եզրափակիչ տանող ճանապարհին: Հաղթանակներ տոնելու դեպքում կիսաեզրափակչում արդեն կարող է կայանալ Հարությունյան-Իսլամ Բեկա Ալիև(Ռուսաստան) գոտեմարտը:
