ԵՐԵՎԱՆ, 15 օգոստոսի — Sputnik. Ռիո դե Ժանեյրոյում երկուշաբթի վազքուղի դուրս եկան Դիանա Խուբեսերյանն ու Գայանե Չիլոյանը:
Հայաստանի երկու վազորդուհիներն էլ հանդես եկան 200 մետր վազքատարածության որակավորման մրցումներում: Չորրորդ մրցահերթում Դիանա Խուբեսերյանը ութ վազորդուհիների մեջ 25.16 արդյունքով զբաղեցրեց յոթերորդ տեղը, իսկ Գայանե Չիլոյանը հինգերորդ մրցահերթում 25.03 արդյունքով ութերորդն էր: Որակավորում ստացան մրցահերթերում առաջին ու երկրորդ տեղ զբաղեցրած վազորդուհիները:
Եռացատկի մրցումներին էլ Հայաստանը ներկայացրեց Լևոն Աղասյանը, որի վերջնական արդյունքն է 15մ 54սմ: Այս արդյունքով Աղասյանը Ա խմբում զբաղեցրեց 18-րդ տեղը: Իսկ ընդհանուր ցուցակում հայ հեռացատկորդը 38-րդն էր: Որակավորման Ա խմբի մրցումներում 17մ 10սմ արդյունքով հաղթեց չինացի Դոնգ Բինը:
