ԵՐԵՎԱՆ, 14 օգոստոսի — Sputnik. Մինչ մրցումների մեկնարկը տեղեկություն ստացանք, որ Մերդինյանը վնասվածքով է դուրս գալու մրցահարթակ: Հայ մարմնամարզիկի դաստակների ուռածության պատճառով մարզիչները որոշել էին չբարդացնել Հարությունի առանց այն էլ բարդ վարժությունը:
Եզրափակիչում որակավորման փուլի արդյունքները ընդհանրապես չեն հաշվում: Որ մարմնամարզիկը ստանում է բարձր գնահատական, նա էլ հաղթող է ճանաչվում: Հարությունն իր վարժությունը կատարելու էր վեցերորդը, ընդ որում մարզիկից առաջ և հետո հանդես էին գալու հիմնական մրցակիցները՝ Լուիս Սմիթը և Մաքս Ուիթլոկը:
Ցավոք, նման իրավիճակում Հարությունը չկարողացավ առանց վրիպումների կատարել վարժությունը, և, ստանալով 14.933 գնահատական, նա հետ մնաց մրցակիցներից ու զրկվեց օլիմպիական մեդալ վաստակելու հնարավորությունից: Իսկ օլիմպիական չեմպիոնի կոչում նվաճեց Մաքս Ուիթլոկը՝ 15.966 արդյունքով:
