ԵՐԵՎԱՆ, 14 օգոստոսի — Sputnik. Այսօր՝ օգոստոսի 14-ին, իրենց երկրորդ մենամարտերում պարտվեցին Արամ Ավագյանն ու Հովհաննես Բաչկովը: Բնականաբար, Հայաստանը ներկայացնող մարզիկներից բացի, հոգեբանորեն շատ ծանր վիճակում է նաև հավաքականի գլխավոր մարզիչ Կարեն Աղամալյանը, որի միակ հույսը դարձավ Նարեկ Աբգարյանը: Սակայն հավաքականի մարզիչն իր բռնցքամարտիկներից գոհ է:
«Ես համոզված եմ, որ մասնավորապես այսօր մերոնք չեն պարտվել: Գուցե ամեն մեկը մրցակցին զիջել է մեկ ռաունդ, բայց չի պարտվել մենամարտը»,- Sputnik Արմենիայի թղթակցին ասաց Աղամալյանը:
Այսօր կայացած մրցման ժամանակ առաջին հայացքից հայ մարզիկները հավասար պայքար էին մղում: Սակայն վերջնական որոշումը մրցավարներինն է: Եվ բռնցքամարտիկ Արամ Ավագյանի դեպքում մրցավարների որոշումը 3:0 հաշվով հաղթանակ տվեց իռլանդացի Մայքլ Կոնլանին, իսկ Հովհաննես Բաչկովի դեպքում՝ 2:1 հաշվով չինացի բռնցքամարտիկին:
Իհարկե, մարզչի կարծիքը շատ կարևոր է, բայց մրցավարների որոշման դեմ այդ կարծիքը իրավական ուժ չունի: Իհարկե ափսոս, որ մեր բռնցքամարտիկները զիջեցին ճանապարհը մրցակցին: Ու եթե նույնիսկ մրցավարական անարդար որոշում է եղել, միևնույնն է՝ ոչ մեր օգտին:
