ԵՐԵՎԱՆ, 14 օգոստոսի — Sputnik. Հայ ըմբիշները թիմային վերջին մարզումն անցկացրին Ռիոյի մարզիկների պուրակում տեղակայված ըմբշամարտի մարզումային դահլիճում:
Թիմին արդեն միացել են 65 կգ քաշային աշխարհի և Եվրոպայի չեմպիոն Դավիթ Սաֆարյանը, ինչպես նաև Օլիմպիական խաղերի բրոնզե մեդալակիր, նախկինում Ռուսաստանի հավաքականի անդամ 97 կգ քաշային Գեորգի Կետոևը:
Ըմբիշները սկզբում նախավարժանք արեցին, ապա անցան գորգային մարզման: Հավաքականի երկրորդ մարզիչ Հովսեփ Հովսեփյանը նշեց, որ հատուկ ժամանել են մրցումներից մի քանի օր առաջ, որպեսզի անցնեն ադապտացիոն շրջանը։ Նրա խոսքով` առաջին օրերին ժամանած Գառնիկ Մնացականյանը և Լևան Բերիանիձեն հարմարվել են տեղի ժամանակին։ Մարզման ընթացքում ըմբիշների տրամադրությունը շատ բարձր էր, չնայած մարզումային խիստ գրաֆիկի։
Բացի Հայաստանի հավաքականից, նույն դահլիճում էին մարզվում նաև տարբեր երկրների օլիմպիականները։ Դահլիճում անհատական ծրագրով մարզում էր ացկացնում նաև Լոնդոնի Օլիմպիական խաղերի արծաթե մեդալակիր, աշխարհի գործող չեմպիոն 57 կգ քաշային Վլադիմիր Խինչիգաշվիլին, որը հանդիսանում է Գառնիկ Մնացականյանի հակառակորդն այս խաղերում։
Վրացի ըմբիշը նախավարժանք կատարելու ընթացքում մոտեցավ և ողջունեց Հայաստանի հավաքականի տղաներին և մարզիչներին: Գեորգի Կետոևի հետ նրանք խորհուրդներ փոխանակեցին։ Մարզումից հետո Արայիկ Բաղդադյանը տեղեկացրեց, որ Ռուսաստանի ազատ ոճի ըմբշամարտի հավաքականը չի մարզվում Ռիոյում, նրանք առանձին հավաք են անցկացնում Սան Պաուլոյում քաղաքում:
Հիշեցնենք, որ ազատ ոճային ըմբիշները պայքարի մեջ կմտնեն օգոստոսի 19-ից:
