ԵՐԵՎԱՆ, 12 օգոստոսի — Sputnik. Սպորտային կարգուկանոնը խախտելու համար օլիմպիական թիմից հեռացված մարմնամարզիկ Յուրի Վան Գելդերի տատը հայ է։ Այս մասին Ֆեյսբուք սոցիալական ցանցի իր էջում գրել է «Ռոսիա Սեգոդնյա» ՄԼԳ-ի գլխավոր խմբագիր Մարգարիտա Սիմոնյանը։
«Պապս` Սարգիս Սիմոնյանը, ծնվել ու ապրել է Ղրիմում։ Պատերազմը սկսվելուն պես նա մեկնել է ռազմաճակատ։ Ղրիմում են մնացել նրա հարազատները, ինչպես նա` նրա ազգական Մարիան։ Երբ գերմանացիները մտել են Ղրիմ, հափշտակել են Մարիային և պատրաստվել են նրան համակենտրոնացման ճամբար ուղարկել` կարծելով, թե հրեա է։ Հարազատները տեղի գյուղխորհրդից տեղեկանք են վերցրել այն մասին, որ Մարիան հրեա չէ, այլ` հայ։ Այդ տեղեկանքն ինձ մոտ է»,- գրել է Սիմոնյանը։
Նրա խոսքով` Մարիային ուղարկել են ոչ թե համակենտրոնացման ճամբար, այլ` գերմանական գործարան` աշխատելու, որտեղ էլ նա ծանոթացել ու ամուսնացել է հոլանդացի Հենրիխ վան Գելդերի հետ։
«Պապիս ընտանիքում ծնվեց հայրս` Սիմոն Սիմոնյանը։ Մարիան նույնպես որդի ունեցավ` Սիմոն վան Գելդերը։ Հորս ընտանիքում ծնվեցի ես, վան Գելդերների ընտանիքում` եղբայրս` Յուրիկը»,- նշված է գրառման մեջ։
Մարգարիտա Սիմոնյանը պատմել է, որ երբ ազգականները Կրասնոդար են եկել, ինքն ու Գելդերը խեցգետին են որսացել Կուբանում։ Եղբոր համար ուրախացել են, երբ որոշել է մեծ սպորտ ոտք դնել, նրա հետ նշել են հաղթանակները, երբ «օղակների տիրակալ» է դարձել։
«Այսօր իսկապես ցավում ենք, որ բոլորը նրա հետ կապված կատակներ են անում։ Որովհետև հարազատս է։ Կյանքը երևակայություններով լի է, ճի՞շտ է»,- գրել է Սիմոնյանը։
Հոլանդացի մարմնամարզիկ Յուրի Վան Գելդերը հեռացվել էր օլիմպիական թիմից՝ սպորտային կարգուկանոնը խախտելու համար։ 33-ամյա մարզիկը լքել էր օլիմպիական ավանը երեկոյան՝ որակավորման փուլի ավարտից հետո, որի ընթացքում նա օղակների վրա վարժությունում 8-րդ հորիզոնականով անցել էր եզրափակիչ։ Ողջ գիշեր Յուրին նշել էր իր նվաճումն ու ալկոհոլ օգտագործել։ Օլիմպիական ավան նա վերադարձել էր վաղ առավոտյան։
«Նման պահելաձևն անթույլատրելի է։ Մարզական տեսանկյունից սա աղետ է, բայց մենք այլընտրանք չունենք»,- նշել էր Հոլանդիայի պատվիրակության նախագահ Մորից Հենդրիքսը՝ մեկնաբանելով մարզիկին հեռացնելու որոշումը։
2009-ին Յուրի Վան Գելդերը մեկ տարով որակազրկվել էր թմրանյութեր օգտագործելու համար։
