ԵՐԵՎԱՆ, 12 օգոստոսի-Sputnik. Գոհար Սարգսյան. ԵՏՄ-ին մեկ տարի 8 ամսվա անդամակցությամբ Հայաստանը շոշափելի արդյունք չի արձանագրել։ Այդ կարծիքն ունի տնտեսագետ Վարդան Բոստանջյանը։ Խնդիրը, նրա խոսքով, Հայաստանի ներքին քաղաքականությամբ է պայմանավորված։
«Այդպիսի միության գործունեության համար չափազանց մեծ համակարգային բնույթի աշխատանք է անհրաժեշտ կանոնակարգման, տնտեսական գործառույթների իրականացման առումով։ ԵՏՄ-ում հայտնվելը մեզ համար չափազանց կարևոր էր, առանց այդ էլ մեր ապրանքաշրջանառության փոքր ծավալների պարագայում միակ շուկան հանդիսանում է ՌԴ-ն։ Մինչդեռ մեր ներքին քաղաքականության պատճառով այստեղ էլ չենք հասնում հաջողության»,-ասաց տնտեսագետը։
Նա մանրամասնեց, որ 2016-ը բարենպաստ գյուղատնտեսական տարի էր, հետևաբար արտահանման ծավալներում աճ է գրանցվել։ Բոստանջյանը սա համարում է բնականոն ընթացք, մինչդեռ ոմանք այն ներկայացնում են սոսկ որպես անդամակցության ձեռքբերում։
«Մեզանում տարվող քաղաքականությունը, մենաշնորհված վիճակը, հարկային ճնշումները, տնտեսվարող սուբյեկտներին խանգարող մոտեցումները թույլ չեն տալիս, որ երկիրը գործի այնպես, ինչպես կարող է։ Դրա համար դեռ չենք կարող խոսել լավ էր դա, թե վատ, առավել ևս չեմ ուզում համալրել այն գրանտակերների բանակը, որոնք արտասահմանից գումար ստանալով, հակված են ԵԱՏՄ-ն բնութագրել միայն բացասական երանգներով»,-ասաց Բոստանջյանը։
Տնտեսագետը հաջողված է համարում «միասնական արժույթ» հասկացությունը` բերելով եվրոպական օրինակը։
«Եթե մենք իսկապես նպատակամետ միություն ենք ստեղծում, միասնական արժույթի մուտքագրումն, ըստ էության, վատ բան չէ, դրա պարզ օրինակը եվրոն է, որ միասնական բնույթ է կրում, եթե ունենար սարսափելի խոցելի կողմեր, առաջադեմ երկրները չէին հավաքվի դրա շուրջ։ Այդ պարագայում ամեն մի իրացնող սուբյեկտ չի կարող մտածել, որ ես միանգամից կատարեմ այնպիսի գործողություններ, որ բերի ինձ անսահման հարստության։ Միասնական արժույթի պարագայում գնային հարաբերությունները կկարգավորվեն»,-ասաց նա։
Չնայած այս թեմայով բազմաթիվ մեկնաբանություններ հնչեցին ընթացիկ տարում, այդուամենայնիվ, հարցը մնում է արդիական։ Օրինակ, Եվրասիական տնտեսական միությունում ԵՏՀ Կոլեգիայի անդամ, մակրոէկոնոմիկայի և ինտեգրման հիմնական ուղղությունների նախարար Տատյանա Վալովայան հունիսին Sputnik Արմենիա միջազգային մամուլի ակումբում հայտնեց, որ տվյալ պահին անհրաժեշտություն չկա միասնական արժույթ ներմուծել։
«Դրա համար չկան ո´չ պայմաններ, ո´չ պահանջարկ։ Առաջին հերթին մենք ուշադիր ուսումնասիրել ենք Եվրամիության փորձը և շարունակում ենք այն ուսումնասիրել»,-ասել էր նա։
Միասնական բանկի և միասնական արժույթի ստեղծման հավանականության մասին խոսել էր նաև ՀՀ փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանը։
«Այս պահին ընդամենը կոորդինացման քննարկումներ կան, սակայն միասնական արժույթի քննարկումներ առայժմ չեն տարվում»,-ընդգծել էր նա։
