ԵՐԵՎԱՆ, 10 օգոստոսի — Sputnik. ՌԴ նախագահ Վլադիմիր Պուտինն ընդգծել է, որ Ռուսաստանը Հայաստանի հետ աշխատելու ծրագիր ունի, իսկ ժամանակակից աշխարհում կարելի է սպառազինություն գնել որտեղ պատահի։ Այս մասին գրում է ՌԻԱ Նովոստին։
«Ինչ վերաբերում է սպառազինությանը, ապա մենք համապատասխան ծրագիր ունենք, Հայաստանի հետ աշխատանքի ծրագիր։ Հայաստանը ՀԱՊԿ անդամ է, Հայաստանը մեր դաշնակիցն է։ Մենք որոշակի փոխադարձ պարտավորություններ ունենք, և Ռուսաստանը միշտ կատարում է իր պարտավորությունները»,- ասել է Պուտինը։
ՌԴ նախագահը նշել է նաև, որ ժամանակակից աշխարհում կարելի է ցանկացած սպառազինություն ձեռք բերել։
«Ժամանակակից շուկայում ցանկացած երկիր կարող է ցանկացած սպառազինություն գնել։ Եվ, ասենք, այնպիսի երկիր, ինչպիսին Ադրբեջանն է` նավթարդյունահանող երկիր, գրեթե 10 միլիոն բնակչություն և արագ աճող տնտեսություն ունեցող երկիր, իհարկե, ի վիճակի է զենք գնել որտեղից ուզի»,- ավելացրել է նա։
Պուտինն ընդգծել է, որ ինքը շեշտը չէր դնի ռազմական ոլորտի վրա։
«Եթե ուզում ենք խնդիրը լուծել, պետք է լուծենք խաղաղ միջոցներով»,- ասել է նա։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
