ԵՐԵՎԱՆ, 10 օգոստոսի — Sputnik. Աշոտ Ահարոնյանի համոզմամբ`ցույցերի ժամանակ քաղաքացիական հագուստով ոստիկանների առկայությունն օրինաչափ է։ Ոստիկանությունն ունի ծառայություններ, որոնք պատասխանատու են օպերատիվ իրավիճակների համար։ Ահարոնյանը միանշանակ հաստատեց, որ մինչ օրս ոչ մի տեսանյութում չի տեսել քաղաքացիական հագուստով ոստիկանի, որը բռնություն է կիրառել լրագրողի նկատմամբ։
«Խնդրում եմ ինձ ցույց տվեք այդ տեսանյութը, որ ասենք` այս գործով կզբաղվենք։ Ցանկացած տեսանյութ կամ լուսանկար, որը հրապարակում եք, դառնում է մեզ համար ուսումնասիրության առարկա»,-ասաց նա։
Ահարոնյանը լրագրողներին կոչ արեց չհրապարակել չփաստարկված լուսանկարներ կամ տեսանյութեր։ Նա հայտարարեց, որ եթե ուղիղ եթերի տեսագրության մեջ ցույց տան քաղաքացիական հագուստով ոստիկանի, որը լրագրողի նկատմամբ բռնություն է կիրառում, ապա նա պատրաստ է ներողություն խնդրել։ Նույնը խնդրեց անել նաև այն լրագրողներին, որոնք չփաստարկված հրապարակումներ են անում։
Վերջում նա ավելացրեց, որ ՀՀ ոստիկանության լրատվության և հասարակայնության հետ կապերի վարչության օպերատորը վերոնշյալ օրերին հրազենային վնասվածք է ստացել։ Գործի քննությունը դեռ ընթացքում է։
Նշենք, որ իրենց մասնագիտական գործունեությունն իրականացնող լրագրողները տուժել էին հուլիսի 29-ի լույս 30-ի գիշերը Երևանի Խորենացու փողոցում և Սարի Թաղում տեղի ունեցած բախման հետևանքով։
Լրագրողի առողջության համար վտանգավոր բռնություն գործադրելով և այլ եղանակներով լրագրողների մասնագիտական օրինական գործունեությանը խոչընդոտելու դեպքերի առթիվ ՀՀ քրեական օրենսգրքի 164-րդ հոդվածի 1-ին և 3-րդ մասերով նախատեսված հանցագործությունների հատկանիշներով ՀՀ գլխավոր դատախազությունում հարուցվել է քրեական գործ։
