ԵՐԵՎԱՆ, 10 օգոստոսի — Sputnik. Յանա Եգորյանի չեմպիոնական տվյալները նկատվել են պարապմունքների հենց սկզբից, ՌԻԱ Նովոստիին տված հարցազրույցում պատմել եմ մարզուհու առաջին մարզիչ Սերգեյ Սյոմինը և նրա մայրը` Մարինա Եգորյանը։
Օգոստոսի 8-ին մրցումների եզրափակչում Եգորյանը 15։14 հաշվով հաղթել է առավել փորձառու հայրենակցին` Սոֆյա Վելիկայային։
22-ամյա երևանցու համար սա դեբյուտային օլիմպիադա է, նա պատանի հասակում ընտանիքի հետ տեղափոխվել է մերձմոսկովյան Խիմկի, որտեղ սկսել է զբաղվել սուսերամարտով Սյոմինի ղեկավարությամբ։
Սպորտային ուղու մեկնարկը
«Նա եկավ ինձ մոտ պարապելու 10 տարեկանում, շատ հաճելի արտաքինով աղջնակ էր։ Յանան ինձ մոտ պարապեց շուրջ մեկ տարի, և ես այդ ընթացքում մի քիչ բացահայտեցի նրան։ Նա շատ նպատակասլաց է։ Նա սպունգի պես կլանում է ամենը, ինչ ասում ես։ Պարզ էր, որ նա սուսերամարտելու է։ Յանան միշտ հաջողություն է ունեցել, միշտ իր առջև նպատակ է դրել և հասել դրան»,- ասել է Սյոմինը։
Յանայի մոր խոսքով, նրա աղջիկը սկսել է սուսերամարտով զբաղվել երջանիկ պատահականությամբ։
«Նրա առաջին մարզիչն ընկերների հետ որոշել է դպրոցում բացել սուսերամարտի դպրոց, որտեղ այդ ժամանակ սովորում էր Յանան։ Հայտարարություն էին տարածել, նա կարդացել է և ընկերուհու հետ գնացել։ Ամեն ինչ սկսվել է հենց դրանից. Յանան ընկերուհու հետ գնացել է, նրանց ցույց են տվել մեդալները, Յանային ամեն ինչ դուր է եկել, և նա ոգևորվել է։ Այդ ժամանակ Յանան ազատ ժամանակ ուներ և որոշեց փորձել», — ասել է Մարինա Եգորյանը։
Նա հավելել է, որ իր աղջիկը ցանկացած պրոֆեսիոնալ մարզիկի նման օլիմպիական ոսկի հաղթելու ցանկություն է ունեցել։
Հաղթանակից հետո
«Ես հեռախոսով խոսել եմ նրա հետ, ճիշտ է, ոչ հաղթանակից անմիջապես հետո… Ձայնը խռպոտած էր. շատ էր գոռացել։ Մենք զրուցեցինք, ես շնորհավորեցի նրան, ասաց, որ գնում է պարգև ստանալու», — ասել է Սյոմինը և հավելել, որ նրան հաջողություն է մաղթել ամսի 13-ի թիմային մրցումներում։
Մարինա Եգորյանը նշել է, որ խռպոտած ձայնը Յանայի համար սովորական երևույթ է ցանկացած մրցումից հետո։
«Մենք զանգահարել ենք նրան։ Երջանկությունից արտասվում էր, ասաց. «Մամ, ես երջանիկ եմ»։ Դա ուղղակի աննկարագրելի զգացողություն է»,- ասել է նա։
«Մենք համոզված ենք, որ նրանք կշահեն երկրորդ ոսկին… Բոլոր աղջիկները լավ մարզավիճակում են, նրանք պարտավոր են թիմային ոսկի շահել։ Մենք շատ մեծ հույսեր ունենք և հավատում ենք նրանց»,- ասել է Յանայի մայրը։
Տարբեր վայրերում արդեն սկսել են նշել Յանա Եգորյանի հաղթանակը, բայց առայժմ գլխավորը նրա վերադարձին սպասելն է։
«Մեզ մոտ արդեն տոն է։ Հյուսիսային Օսեթիայում նրա պատվին մեծ միջոցառում է կազմակերպվել, ընդհուպ մինչև հրավառություն, որովհետև այնտեղ ապրում են մեր հարազատները։ Պատմական հայրենիքում` Հայաստանում, նույնպես տոնում են Յանայի հաղթանակը»,- ասել է մարզուհու մայրը։
Նա նշել է, որ Յանայի համար գլխավորն այն է, որ մեր սուսերամարտիկները ոսկի շահեն և բարեհաջող վերադառնան տուն։
