Փորձագետ Սամվել Մարտիրոսյանի գրառման մեջ նշված է. «Ցանցում հայտնվել է ու շատ արագ տարածվում է մի վիրուս, որը հայերեն է ու ներկայանում է ՀՀ Ոստիկանության անունից։ Այսպիսի բան տեսնելու դեպքում հանկարծ չվազեք վճարելու»։ Մարտիրոսյանը ներկայացրել է այն տեքստը, որը ուղարկվում է Ոստիկանության անունից։
Մարտիրոսյանի խոսքով` վիրուսը նոր չէ, պարզապես հայ օգտատերերի համար է անսովոր, քանի որ մարդիկ սովոր չեն նման բաներ տեսել հայերեն լեզվով և, բնականաբար, կարող են «խայծը կուլ տալ»։
Էլեկտրոնային փոստով ուղարկված նամակի տեքստում նշվում է, որ ոստիկանությունը արգելափակել է օգտատիրոջ համակարգիչը և այն արգելափակումից հանելու համար պետք է գումար փոխանցել «Яндекс Деньги» վճարման համակարգով։ Փորձագետի խոսքով`նամակի ամբողջ իմաստն այն է, որ մարդկանց վախեցնեն, տպավորություն ստեղծեն, թե դա պաշտոնական նամակի է, ու եթե անգամ 10 հազարից մեկն էլ վճարի պահանջված 8500 դրամը, դա արդեն մեծ գումար կկազմի։
Մարտիրոսյանը մանրամասն ներկայացնում է վիրուսը շրջանցելու ճանապարհները և հորդորում է միշտ զգոն լինել, քանի որ մարդիկ սովորաբար համացանցում գործողություններ են անում շատ արագ, երբեմն առանց մտածելու, այնինչ պետք է մտածել, հետո նոր սեղմել «մկնիկի» համապատասխան կոճակը։
