ԵՐԵՎԱՆ, 2 օգոստոսի — Sputnik. Եթե հայկական ատոմային էլեկտրակայանը 2017թ-ին վեց ամսով դադարեցնի գործունեությունը, ապա կրկնվի 90-ականների էներգետիկ ճգնաժամը, լրագրողների հետ հանդիպմանն ասաց «Սպառողների ասոցիացիա» հասարակական կազմակերպության նախագահ Արմեն Պողոսյանը։
«Մենք կրկին կապրենք լամպերի և մոմերի լույսի տակ։ Դուք պատկերացնու՞մ եք, թե դա ինչ է նշանակում ծանր ժամանակներ ապրած երկրի համար», — ասաց Պողոսյանը։
Նրա խոսքով` մարդիկ արմատական փոփոխություններ են ուզում, ինչի վկայություն է երկրում տեղի ունեցած վերջին միջադեպը, երբ «Սասնա ծռեր» զինված խումբը գրավեց ոստիկանության պարեկապահակային ծառայության շենքը։
Սոցիոլոգ Ահարոն Ադիբեկյանն անընդունելի է համարում երկրում առկա խնդիրները նման կերպ լուծելու տարբերակը։
«Ես դեմ եմ խնդիրներն ուժային ճանապարհով լուծելու մեթոդներին, դեմ եմ, որ ինչ-որ մեկն իմ փոխարեն որոշի, թե ինչպիսի երկրում և ինչ իշխանությունների օրոք ես ապրեմ»,- ասաց Ադիբեկյանը։
Նրա խոսքով` սոցիոլոգիական հետազոտությունները ցույց են տալիս, որ յուրաքանչյուր վեցերորդ հայը պատրաստ է ուժային ճանապարհով փոխել գործող պետական իշխանությունը, իսկ յուրաքանչյուր երրորդը պատրաստ է մասնակցել ցույցերի և հանրահավաքների։
«Մեկ անձի փոփոխությունը երբեք չի հանգեցնի բարելավման։ Երկրում ինչ-որ բան փոխելու համար պետք է փոխվի սերունդը»,- ասաց սոցիոլոգը։
Նա նշեց, որ նման իրավիճակները բացասական ազդեցություն կունենան զբոսաշրջության վրա, ինչն իր հերթին կանդրադառնա երկրի տնտեսության վրա։ Ապրիլյան իրադարձություններից հետո դեպի Հայաստան տոմսերի վաճառքը նվազել է 25 տոկոսով, իսկ թե ինչ կլինի հիմա, անհայտ է։
2014թ-ի դեկտեմբերին Ռուսաստանի Դաշնությունը և Հայաստանի Հանրապետությունը ստորագրել են միջկառավարական համաձայնագիր` Հայկական ԱԷԿ-ի երկրորդ էներգաբլոկի շահագործման ժամկետը 10 տարով` մինչև 2026թ-ը երկարացնելու մասին։ Համաձայնագրի շրջանակում Ռուսաստանը Հայաստանին կտրամադրի 270 մլն դոլար վարկ և ևս 30 մլն դոլար որպես դրամաշնորհ։
Նախատեսվում է, որ այդ աշխատանքները կսկսվեն 2017թ-ի գարնանը և կտևեն վեց ամիս։
