ԵՐԵՎԱՆ, 2 օգոստոսի — Sputnik. Գառնիկ Իսագուլյանը պատմեց, որ տիտանական աշխատանք է տարվել բանակցությունների ճիշտ ընթացք ապահովելու համար։ Դրա համար էլ, ըստ նրա, իրադրությունը խաղաղ հանգուցալուծում ստացավ։
«Եթե 2 օրերի սադրիչ գործողությունները չլինեին, ապա բարեհաջող կավարտվեր Վիտալի Բալասանյանի միջնորդական առաքելությունը առաջին փուլում, որի հետ կապված հանրապետության նախագահը հստակ հայտարարություն է արել` ընդունել Ժիրայր Սեֆիլյանին, քննարկել տարբեր խնդիրներ, եթե տղաները մտնեն օրինական դաշտ և զենքերը կամովին վայր դնեն»,-ասաց նա։
Նրա խոսքով` սադրիչ գործողություններն անգամ չխոչընդոտեցին, որ «Սասնա ծռերի» տղաները մտնեն բանակցությունների փուլ։
«Տղաները հասկացել են, որ իրենց օգտագործում են. շատերին պետք է նրանց մահն ու արյունը, որ գործընթացներն ունենան այլ շարունակություն։ Նրանք զենքը վայր դրեցին, նրանք իրենք են որոշել, որ վայր են դնում»,-ասաց Իսագուլյանը։
Նա ավելացրեց, որ հստակ ցուցումներ կային, որպեսզի զենքը վայր դնելուց հետո խմբի անդամների հանդեպ հանդուրժողական վերաբերմունք դրսևորվի։ Դա նա որակեց որպես «մարդկային» վերաբերմունք։
Այն հարցին, թե ինչ է լինելու «Սասնա ծռեր» խմբի անդամների հետ հետագայում, Բալասանյանը կարճ ու կոնկրետ պատասխանեց, որ նրանց պաշտպանության խնդրին առաջինը լծվել է Վիտալի Բալասանյանը։ Խորհուրդ տվեց չխանգարել գործընթացին հանգուցալուծումը տեսնելու համար։ Նա վստահեցրեց, որ նաև երկրի իշխանությունն է մտածում տղաների մասին։
Հուլիսի 17-ի գիշերը «Սասնա ծռեր» զինված խումբը Էրեբունի վարչական շրջանում գրավեց Ոստիկանության պարեկապահակային գնդի շենքը։ Գրոհի ժամանակ մահացավ ՊՊԾ գնդի պետի տեղակալ Արթուր Վանոյանը, մի քանի մարդ վիրավորվեց։ Նրանք պահանջում էին ազատ արձակել «Հիմնադիր խորհրդարան» քաղաքացիական նախաձեռնության ներկայացուցիչ Ժիրայր Սեֆիլյանին, ինչպես նաև երկրի նախագահի հրաժարականը։ «Սասնա ծռերը» զենքը վայր դրեցին և իշխանությանը հանձնվեցին հուլիսի 31-ին։ «Սասնա ծռերը» իրենց ռազմագերի հայտարարեցին, թեև, միջազգային իրավունքի համաձայն, նրանք չեն կարող այդպիսին համարվել։
