ԵՐԵՎԱՆ, 1 օգոստոսի — Sputnik. Շենք — շինությունների զավթման ու ապօրինի զենք-զինամթերք պահելու մեղադրանքով կալանավորված Պավել և Արամ Մանուկյաններն ունեն շտապ վիրահատության կարիք, ինչը «Դատապարտյալների հիվանդանոց» ՔԿՀ-ում հնարավոր չէ կազմակերպել: Լրագրողների հետ հանդիպմանը հայտարարեց նրանց փաստաբան Ինեսա Պետրոսյանը:
Պավել Մանուկյանն այս պահին, թեև գտնվում է դատապարտյալների հիվանդանոցում, բայց նրան հսկում են Էրեբունի հիվանդանոցի բժիշկները:
«Դատապարտյալների հիվանդանոցը նեղ մասնագետներ չունի, այդ է պատճառը, որ երեկ Էրեբունի բժշկական կենտրոնից նշանակվել է շուրջօրյա հերթապահություն իրականացնող բժիշկ»,- ասաց Ինեսա Պետրոսյանը՝ հավելելով, որ Արամ Մանուկյանին ևս դատապարտյալների հիվանդանոց տեղափոխելուց հետո նրան վիրակապելու համար այդտեղ էին գալիս Էրեբունի հիվանդանոցի մասնագետները:
«Բոլոր պայմաններն այնպիսին էին, որ նրանք ուղղակի պետք է մնային ու իրենց բուժումը շարունակեին Էրեբունի ԲԿ-ում, որտեղ և վիրահատվել էին, և ոչ թե ՔԿՀ-ում, որտեղ գրեթե պայմաններ չկան, համապատասխան բժիշկներ չկան»,- ասաց փաստաբանը:
Ի դեպ, Պավել Մանուկյանը ՊՊԾ գնդից դուրս գալուց հետո հացադուլ էր հայտարարել, և, ինչպես տեղեկացրեց նրա փաստաբանը, մինչ օրս շարունակում է:
Ինչ վերաբերում է կալանքի որոշմանը, Ինեսա Պետրոսյանը դատարանի ու նախաքննական մարմնի պատճառաբանությունը, թե իր պաշտպանյալը կարող է փախչել կամ խոչընդոտել քննությանը, անտրամաբանական որակեց՝ հայտնելով, որ խափանման միջոցի ընտրության նպատակով Պավել Մանուկյանին դատարան են տեղափոխել պատգարակով, և դատական նիստին նա ևս մասնակցել է պատգարակի վրա պառկած՝ 3 բժիշկների հսկողության ներքո: Ի դեպ, Ինեսա Պետրոսյանի խոսքով` դատարանի որոշման մեջ Պավել Մանուկյանի վիճակի մասին որևէ նշում չկա, առկա չեն նաև նրա ներկայացրած առարկություններն ու հայտարարությունները:
Արցախյան ազատամարտի մասնակից, ԼՂՀ պահեստային մայոր, ԼՂՀ Մարտական Խաչ 2-րդ աստիճանի շքանշանի ասպետ Պավել Մանուկյանը գնդացրային վիրավորում էր ստացել հուլիսի 23-ին և տեղափոխվել «Էրեբունի» բժշկական կենտրոն, ապա՝ «Դատապարտյալների հիվանադանոց» ՔԿՀ:
