ԵՐԵՎԱՆ, 31 հուլիսի — Sputnik. Հուլիսի 31-ին արված գրառումը Սերժ Թանկյանը սկսել է այսպես. «Մտքեր Հայաստանում դիմակայության և դրա հետ կապված քաղաքական խութերի մասին»։
Նա նշել է, որ մարդկանց մեծ մասն ամբողջ աշխարհում շփոթված է, թե ինչու ոստիկանական գնդի գրավումը Հայաստանի հասարակության մի հատվածի և իշխանությունների միջև անդառնալի պառակտման հանգեցրեց։
Նրա խոսքով՝ անվերջանալի համակարգված կոռուպցիան, դատական անհավասարությունը, ոստիկանության դաժանությունները, ընտրությունների կեղծումը, արտաքին ինտերվենցիան, տնտեսական հնարավորությունների բացակայությունը հանգեցրել են հայաթափման և դարձել են վառոդի տակառ, որի վրդովմունքն ուղղված է իշխող կառավարության և նախագահ Սերժ Սարգսյանի դեմ։
«Միայն անպատասխանատու, անհավասար ծրագրերը և կառավարության ռեակցիան կարող են հեղափոխություն ստեղծել Հայաստանում։ Նշանակում է, որ մենք պետք է նպաստենք երկրում քաղաքացիական հասարակության հետագա ամրապնդմանը և մեծացնենք ջանքերը առաջիկա ընտրությունների դիտարկման հարցում՝ ամբողջական թափանցիկությամբ և միջազգային լրատվամիջոցների ներկայությամբ»,- գրել է Թանկյանը։
Նրա խոսքով՝ նախկինում բողոքի ցույցների ժամանակ հասկացանք մի բան, թե ինչպես են գերտերությունները շահագրգռված այդ ակցիաներն օգտագործել որպես քաղաքական գործիք՝ սեփական շահերի համար։ Մեզ պետք է դիվանագիտորեն հեռանալ միաբևեռ աշխարհաքաղաքականությունից և տեսնել այն ամենը, ինչը բխում է մեր հայրենիքի շահերից։
Թանկյանի կարծիքով՝ հայկական սփյուռքը պետք է կազմակերպվի ու դառնա «զսպումների ու հակակշիռների» համակարգ, որի կարիքը երկիրը շատ ունի։
«Մենք այլես չենք կարող հույս դնել «փրկիչ» առաջնորդի կամ նախագահի վրա։ Մենք չպետք է բան պահանջել դեմագոգներից ու կուռքերից։ Մեր կամքը և ապագա քննարկումները պետք է տեղի ունենան հայ ժողովրդի հետ` հանրային ֆորումների միջոցով, որը տանում է իրական ժողովրդավարության»,- ասել է նա։
Երգիչն անդրադարձել է նաև լրագրողների նկատմամբ կիրառված բռնություններին:
«Մենք Էրդողանի Թուրքիայում չենք. լրագրողների նկատմամբ բռնություն ու բանտարկություններ չպետք է հանդուրժել։ Մեր մշակւթային ժառանգության մեջ է խոսել բաց ու բարձրաձայն, և մենք վաստակել ենք դա 600 տարվա օսմանյան լծից հետո։ Լրագրողների դեմ բռնությունը թուլության նշան է կառավարության կողմից ցանկացած երկրում»,- գրել է նա։
Նրա խոսքով՝ ՀՀ ոստիկանապետը, Երևանի քաղաքապետը պետք է հրաժարական տան:
«Ոչ մի բռնություն. որքան էլ ժողովուրդը զայրացած լինի, չպետք է բռնության ալիք բարձրացնի ոստիկանության ներկայացուցչի կամ որևէ մեկի նկատմամբ: Այդ սպաների մեծ մասը մեր որդիներն ու դուստրերն են և ավելի շատ մեղավոր չեն անարդարությանն անձնապես ենթարկվելու համար, քան մենք ինքներս, նույնիսկ եթե նրանք հետևում են կառավարության հրամաններին։ Ոչ ոք արժանի չէ բռնության։ 90 տոկոս գրագիտության պայմաններում երկիրը չպետք է ամբոխի իշխանություն ունենա»,- գրել է երգիչը։
Թանկյանի կարծիքով՝ Հայաստանի նախագահն ու ղեկավարությունը պետք է առաջնորդություն դրսևորեն և անհապաղ թուլացնեն լարվածությունը՝ գնալով զիջումների։
«Ամենակարևորն այն է, որ պետք է հենց հիմա դադարեցնել արյունահեղությունը Երևանի փողոցներում»,-եզրափակել է նա։
