ԵՐԵՎԱՆ, 29 հուլիսի-Sputnik. Վերջին օրերին Խորենացի փողոցում, ապա և Ազատության հրապարակում կազմակերպվող հավաքներին մասնակցում են նաև անչափահասներ:
Նման միջոցառումներին նրանց հետագա մասնակցության դեպքում չի կարելի անտեսել հնարավոր վտանգները, իր ֆեյսբուքյան էջում գրել է ոստիկանության հասարակության հետ կապերի վարչության պետ Աշոտ Ահարոնյանը:
«Դեռահասը տարիքի բերումով չի կարող ադեկվատ գնահատել իրավիճակը, բազմության և իր գործողություններն ու դրանց հետևանքները: Ուստի դիմում ենք ծնողներին. ուշադիր եղեք ձեր երեխաների հանդեպ, մի թողեք առանց հսկողության, մի թույլատրեք մասնակցել հանրահավաքին»,-գրել է Աշոտ Ահարոնյանը:
Նա հավաքների կազմակերպիչներին ու մասնակիցներին կոչ է արել մշտապես տեսադաշտում պահել հավաքի գոտում հայտնված՝ ծնողների հսկողությունից դուրս մնացած դեռահասներին, հսկել նրանց պահվածքն ու տեղաշարժը և երեխաների հետ կապված կասկածելի իրավիճակներում անհապաղ դիմել ոստիկաններին:
Երեխաների անվտանգության ապահովումը բոլորիս խնդիրն է:
