ԵՐԵՎԱՆ, 29 հուլիսի-Sputnik. «Շտապօգնության» բուժակ Դավիթ Տոնոյանը, որին գործընկերների հետ հուլիսի 27-ին պատանդ էին վերցրել «Սասնա ծռեր» զինված խմբի անդամները, ազատ է արձակվել նույն օրը երեկոյան և մեկնել Լեռնային Ղարաբաղ։
Այդ մասին տեղեկատվությունը հաստատեց «Շտապօգնություն» ՓԲԸ-ի տնօրեն Թագուհի Ստեփանյանը։
«Նա մեկնել է Արցախ` բանակում ծառայող եղբորը տեսակցելու», — ասաց Ստեփանյանը։
Ինչ վերաբերում է բժիշկներին, որոնք մինչև հիմա գտնվում են զինված խմբի մոտ, ապա Ստեփանյանը նշեց, որ այսօր խոսել է նրանց հետ։
«Վերջին անգամ բժիշկների հետ խոսել եմ երկու ժամ առաջ, մենք չկարողացանք նրանց ինչ-որ բան փոխանցել։ Հիմա փորձում ենք կազմակերպել նրանց հագուստ և սննդամթերք հանձնելու գործընթացը»,- ասաց Ստեփանյանը։
Այն հարցին, թե ինչ վիճակում է «Սասնա ծռերի» վիրավոր անդամը, որը գտվում է ՊՊԾ տարածքում, Sputnik Արմենիայի զրուցակիցը նշեց. ««Շտապօգնության» բժիշկները կարող են նրան առաջնային օգնություն ցուցաբերել, բայց նրանց մեջ վիրաբույժներ չկան, իսկ վիրավորը ստացիոնար բուժման կարիք ունի»։
