ԵՐԵՎԱՆ, 29 հուլիսի — Sputnik. 2011թ-ից ի վեր Հայաստանի բնակչությունը նվազել է մոտ 25 000-ով: Այս մասին այսօր Sputnik Արմենիային հայտնեց ՀՀ ԱՎԾ Մարդահամարի և ժողովրդագրության բաժնի պետ Կարինե Կույումջյանը:
Վերջին 15 տարվա ընթացքում Հայաստանից հեռացել է 217 911 մարդ: Պաշտոնական վիճակագրության համաձայն, 2001թ-ին անցկացված մարդահամարի տվյալներով, Հայաստանում մշտապես բնակվողների թիվը կազմում էր 3 213 011 մարդ, 2011-ի մարդահամարի տվյալներով՝ 3 018 000, իսկ այս տարվա հուլիսի 1-ի դրությամբ մեր երկրում մշտապես բնակվում է 2 995 100 մարդ: Ընդ որում, այս թիվը շատ ավելի մեծ կլիներ, եթե Հայաստանում վերջին տարիներին ծնունդները չավելանային:
«Այս ընթացքում տարեկան 15 000 բնական հավելաճ ենք ունենում, ինչը մեղմում է մեր միգրացիան: Եթե դա չլիներ, մենք տարեկան 27 000-ի նվազում կունենայինք», — ասաց Կարինե Կույումջյանը:
Այս տարվա առաջին կիսամյակում Հայաստանում ծնվել է 18 439 երեխա, մահացել է 14 306 մարդ: Այսպիսով, ծնունդների թիվը շուրջ 4000-ով գերազանցել է մահվան ցուցանիշը:
Ծնունդների մեծ մասը գրանցվում են հիմնականում մայրաքաղաքում կամ խոշոր քաղաքներում: Մինչդեռ մարզերում ու հատկապես գյուղական համայնքներում ավելի շատ մահացողներ կան, քան ծնվողներ:
Ծնելիության ամենացածր ցուցանիշը գրանցվել է Գեղարքունիքի, Տավուշի, Սյունիքի մարզերում: Մահերի մեծ մասը գրանցվել է Լոռու մարզում, որտեղ յուրաքանչյուր 1000 բնակչից այս տարվա ընթացքում մահացել է 14-ը:
Քանի որ այս մարզում ծնունդների քանակն էլ ցածր է, ապա պաշտոնական տվյալներով, Լոռին այս տարվա ընթացքում կորցրել է յուրաքանչյուր 1000 բնակչից երկուսին:
Բայց Լոռու մարզն այս հարցում միակը չէ:
Կարինե Կույումջյանի խոսքով, բացի Երևանից, հանրապետության մյուս բոլոր բնակավայրերում բնակչության թվի նվազում կա:
