ԵՐԵՎԱՆ, 29 հուլիսի — Sputnik. Սոցիալապես անապահով ընտանիքներին աջակցելու համար ՀՀ կառավարությունը սոցիալական նպաստի չափը բարձրացրեց 1000 դրամով։
«Այս քայլի նպատակն է հատուցել 112 հազար 300 ընտանիքների` էլեկտրաէներգիայի թանկացմամբ պայմանավորված լրացուցիչ ծախսերը»,- շեշտեց ՀՀ սոցիալական հարցերի նախարար Արտեմ Ասատրյանը։
Նախարարը մեջբերեց հանրային ծառայությունները կարգավորող հանձնաժողովի գնահատականը, ըստ որի`էլեկտրաէներգիայի միջին ամսական սպառումն ընտանիքների կողմից կազմում է շուրջ 202 կվտ, ձմեռային ամիսներին` 325, իսկ ամառային ամիսներին` 180 կվտ:
ՀՀ վարչապետ Հովիկ Աբրահամյանը հիշեցրեց, որ նախորդ տարվա օգոստոսի 1-ից էլեկտրաէներգիայի սակագինը թանկացել էր 6,93 դրամով, ՀՀ կառավարությունը և «Տաշիր» ընկերության ղեկավար Սամվել Կարապետյանը քննարկել ու պայմանավորվել էին այդ ավելացումը փոխհատուցել երկուստեք:
«Էլեկտրաէներգիայի սակագինն այս տարվա օգոստոսի մեկից նվազել է 2.61 դրամով, փաստորեն սակագինը թանկանում է 4,35 դրամով: Հարցը քննարկել ենք նաև Հանրապետության նախագահի հետ և այդ ծախսը կառավարությունը վերցնում է իր վրա»,- ասաց Հովիկ Աբրահամյանը՝ ավելացնելով, որ այդ նպատակով պետբյուջեից այս տարի կհատկացվի 567 մլն դրամ, իսկ գալիք տարի՝ 1 մլրդ 157 մլն դրամ:
Sputnik Արմենիայի հետ զրույցում «ՀԷՑ» մամուլի խոսնակ Նատալյա Սեմերջյանը հայտնեց, որ սակագնի նվազման հետ կապված բոլոր հարցերը կարգավորում ` հանրային ծառայությունները կարգավորող հանձնաժողովը։
«Սակագնի ավելացման հետ կապված որևէ հարց կոռեկտ չէ, որ ես մեկնաբանեմ, միայն «ՀԷՑ»–ով չի պայմանավորված»,–ասաց նա։
Նատալյա Սեմերջյանը միայն ավելացրեց, որ փաստացի էլեկտրաէներգիայի սակագինը նվազել է։ Այլ բան է, որ հասարակւթյան համար այն թանկ է մնում։ Իսկ սակագնի հետ կապված բոլոր հաշվարկներն անելիս, նրա խոսքով, հաշվի են առնվում էներգետիկ շուկայի «խաղացողների» կատարած ծախսերը։
