ԵՐԵՎԱՆ, 27 հուլիսի — Sputnik. Համացանցում հայտնվել է աշխարհահռչակ գրող Վիլյամ Սարոյանի «Մարդկային կատակերգություն» ստեղծագործության հիման վրա նկարահանված «Իթաքա» ֆիլմի թրեյլերը։
Ռեժիսորը հայտնի դերասանուհի Մեգ Ռայանն է, որը նաև խաղում է ֆիլմում։ Նրա խաղընկերը ոչ պակաս հայտնի, կրկնակի օսկարակիր Թոմ Հենքսն է։
«Մարդկային կատակերգությունը» պատմում է ամերիկյան Իթաքա քաղաքի բնակիչների մասին, որոնք բնակվում են իրենց փոքրիկ և հարմարավետ աշխարհում։
Եվ միայն Ուլիսիս և Հոմեր եղբայրներն են խաթարում անդորրը. մեկը` փոքրիկ չարաճճիություններով, մյուսը` անսպասելի նորություններով։
Հորը, իսկ ավելի ուշ ավագ եղբորը կորցրած Հոմերի ուսերին է ընկնում ընտանիքի հոգսը։ Նա սկսում է հեռագրեր բաժանել և ստիպված է լինում մահվան հեռագրեր տանել հասցեատերերին։
Նա ոչ միայն ժամանակից շուտ է հասունանում, այլև ստիպված է լինում առանց որևէ մեկի օգնության բացահայտել կյանքի անհասկանալի, դաժան և խելահեղ օրենքները։
