ԵՐԵՎԱՆ, 27 հուլիսի — Sputnik. «Էրեբունի» բժշկական կենտրոն տեղափոխված Պավել Մանուկյանի և նրա որդու` Արամ Մանուկյանի, ինչպես նաև գիշերային փոխհրաձգության ընթացքում վիրավորված ոստիկանի առողջական վիճակի մասին նոր տեղեկություն չկա։
«Մենք հեռուստացույցով ենք իմացել, որ Պավլիկը հիվանդանոց է տեղափոխվել, եկել ենք իմանալու՝ ոնց է հիմա»,- Sputnik Արմենիայի թղթակցի հետ զրույցում ասաց Մանուկյանի մորաքույրը՝ չցանկանալով հայտնել իր անունը։
Կինը կանգնած էր ԲԿ-ի շենքի մոտ և չգիտեր ինչպես ներս մտնի։ Խոստովանեց, որ վաղուց չի հանդիպել Մանուկյանի հետ։ Այն հարցին, թե ինչպես է գնահատում ազգականի արարքը, կինը հրաժարվեց պատասխանել և միայն ասաց. «Յուրաքանչյուրը կյանքում իր ուղին ունի»։
Իրավապահ մարմինների ներկայացուցիչները թույլ չեն տալիս լրագրողներին մտնել ԲԿ-ի շենք։ ԶԼՄ-ների հետ վերջին շփումը եղել է առավոտյան։
