ԵՐԵՎԱՆ, 27 հուլիսի — Sputnik. Ադրբեջանի և Հայաստանի նախագահներ Իլհամ Ալիևն ու Սերժ Սարգսյանը շփման գծում ԵԱՀԿ մոնիտորինգային խմբի ընդլայնման վերաբերյալ համաձայնություն են ձեռք բերել, ՌԻԱ Նովոստիին է հայտնել ԵԱՀԿ-ի ամերիկացի համանախագահ Ջեյմս Ուորլիքը։
Նա հայտնել է, որ ԵԱՀԿ ՄԽ համանախագահները ակտիվ աշխատանքներ են տանում նախագահների` Սանկտ Պետերբուրգում և Վիեննայում կայացած հանդիպումների ժամանակ ստանձնած պարտավորությունների կատարման ուղղությամբ` հակամարտության խաղաղ կարգավորման հարցում լարվածությունը թուլացնելու և բանակցությունների գործընթացում առաջընթացի հասնելու համար։
«Նախագահները համաձայնության են եկել հայ-ադրբեջանական սահմանին և շփման գծում ԵԱՀԿ մոնիտորինգային խմբի ընդլայնման հարցում։ Նախատեսվում է շարունակել ընդլայնված բանակցությունները` հակամարտության կարգավորման համար երկու կողմից բարձրաստիճան պաշտոնյաներին ներգրավմամբ։ Կողմերի միջև լարվածությունը նվազեցնելու համար պետք է առաջընթաց արձանագրել դիվանագիտական ուղղությամբ», — ասել է Ուորլիքը։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
