ԵՐԵՎԱՆ, 26 հուլիսի — Sputnik. Հուլիսի 26-ին Երևանում կազմակերպված երթը մեկնարկել է Խորենացու փողոցից։
Ցուցարարներն անցել են ոստիկանության շենքի մոտով և շարժվում են դեպի Ազգային անվտանգության ծառայության շենք։
Չնայած ոստիկանությունը հաղորդագրություն էր տարածել և զգուշացրել, որ ցուցարարներն իրենց հավաքը Խորենացու փողոցից տեղափոխեն այլ վայր, սակայն հանրահավաքն ու հաջորդած երթը բավականին մարդաշատ են:
Խորենացու փողոցում անցկացվող հավաքներն ու բողոքի ցույցերը կազմակերպվում են ի աջակցություն «Սասնա ծռեր» խմբի անդամների:
Հիշեցնենք, որ հուլիսի 17-ի վաղ առավոտյան «Սասնա ծռեր» զինված խմբի անդամները մուտք են գործել ՀՀ ոստիկանության պարեկապահակային ծառայության գնդի տարածք ու պատանդ վերցրել ոստիկանության ծառայողներին։ Զինված հարձակման նախաձեռնողները պահանջում են ազատ արձակել «Հիմնադիր խորհրդարանի» համակարգող Ժիրայր Սեֆիլյանին, ինչպես նաև պահանջում են Հայաստանի իշխանությունների հրաժարականը։
Գրոհի ժամանակ սպանվել է ոստիկանության գնդապետ Արթուր Վանոյանը, վնասվածքներ են ստացել ոստիկանության գնդապետ Արամ Հովհաննիսյանը, փոխգնդապետ Հրաչյա Խոստեղյանը և ենթասպա Գագիկ Մկրտչյանը։
Հուլիսի 23-ին զինված խումբն ազատ է արձակել վերջին 4 պատանդներին, այդ թվում` ՀՀ փոխոստիկանապետ, գեներալ-մայոր Վարդան Եղիազարյանին և Երևանի փոխոստիկանապետ Վալերի Օսիպյանին:
