ԵՐԵՎԱՆ, 26 հուլիսի — Sputnik. Հուլիսի 25 լույս 26-ի գիշերը Ոստիկանության պարեկապահակային ծառայության գնդի տարածքում վիրավորված «Սասնա ծռեր» խմբի անդամ Աշոտ Պետրոսյանի փաստաբան Արայիկ Պապիկյանը Sputnik Արմենիայի հետ զրույցում հաստատեց, որ իր պաշտպանյալի նկատմամբ դատարանն այսօր երկամսյա կալանքի որոշում է կայացրել:
Արայիկ Պապիկյանը մեզ հետ զրույցում նշեց նաև, որ որոշակի հանգամանքներից ելնելով ենթադրում է, որ իր պաշտպանյալն այլևս «Էրեբունի» հիվանդանոցում չէ, տեղափոխվել է այլ վայր, գուցե նաև` ՔԿՀ:
Աշոտ Պետրոսյանին մեղադրանք է առաջադրվել ՀՀ Քրեական օրենսգրքի 219 հոդվածի 3-րդ մասի 1-ին կետով (կազմակերպված խմբի կողմից շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելը) և 235 հոդվածի 3-րդ մասով (կազմակերպված խմբի կողմից ապօրինի կերպով հրազեն, բացի ողորկափող հրազենից և դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը):
«Սասնա ծռեր» խմբի` ավելի վաղ տարածած հայտարարության մեջ նշվում էր, որ գիշերը Ոստիկանության պարեկապահակային ծառայության տարածքին հարակից ոստիկանական պատնեշից կրակ են բացել, որի հետևանքով ոտքերից վիրավորվել են «Սասնա ծռեր» խմբի անդամներ Աշոտ Պետրոսյանը և Հովհաննես Հարությունյանը:
Ոստիկանությունն էլ հայտարարել է, որ ժամը 01.00-ի սահմաններում գնդի տարածքից դուրս է եկել ոստիկանության «ՈւԱԶ» մակնիշի ավտոմեքենան ու շարժվել ոստիկանության Էրեբունու բաժնի ուղղությամբ՝ դեպի արգելապատնեշում կանգնած ոստիկանական շղթան։ Մեքենան ընդհուպ մոտեցել է շղթային, ինչից հետո իրավապահները մեքենայի ընթացքը կասեցնելու և դրանում գտնվող զինված անձանցից անմիջականորեն բխող իրական վտանգը կանխելու համար, կրակ են բացել մեքենայի շարժիչի վրա։ Մեքենան ձախ կիսաշրջադարձ է կատարել, հնչել են կրակոցներ, որից հետո իրավապահները կրակ են բացել մեքենայի անվադողերի ուղղությամբ։
Ի պատասխան՝ հնչել են կրակոցներ, որոնց իրավապահները չեն պատասխանել։ Հրաձգության հետևանքով մեքենայում գտնվող երեք անձանցից երկուսը ոտքերի վնասվածքներ են ստացել և նահանջել գնդի տարածք։
