ԵՐԵՎԱՆ, 26 հուլիսի – Sputnik. Քաղաքական նոր ուժեր են հայտնել, որ միանում են բողոքի շարժմանը, ու թեև ավելի վաղ ոստիկանությունը պահանջել էր փոխել բողոքի ակցիայի վայրը, այնուհանդերձ հավաքի վայրը ոչ միայն չփոխվեց, այլ ավելին` այսօր ավելի շատ մարդ է հավաքվել, քան նախօրդ օրերին։
Հանրահավաքի ընթացքում հնչած կոչերի հիմնական բովանդակությունը հետևյալն է` իրավիճակին լուծում տալու համար պետք է միջամտեն հոգևորականները, «Սասնա ծռերին» չպետք է զրկեն կապի հնարավորություններից, սննդից և իշխանությունները պետք է բանակցությունների սեղանի շուրջ նստեն նրանց հետ։
Ամենայն հավանականությամբ, հանրահավաքից հետո ցուցարարները կրկին երթ կկազմակերպեն։
Հիշեցնենք, որ հուլիսի 17-ի վաղ առավոտյան «Սասնա ծռեր» զինված խմբի անդամները մուտք են գործել ՀՀ ոստիկանության պարեկապահակային ծառայության գնդի տարածք ու պատանդ վերցրել ոստիկանության ծառայողներին։ Զինված հարձակման նախաձեռնողները պահանջում են ազատ արձակել «Հիմնադիր խորհրդարանի» համակարգող Ժիրայր Սեֆիլյանին, ինչպես նաև պահանջում են Հայաստանի իշխանությունների հրաժարականը։
Գրոհի ժամանակ սպանվել է ոստիկանության գնդապետ Արթուր Վանոյանը, վնասվածքներ են ստացել ոստիկանության գնդապետ Արամ Հովհաննիսյանը, փոխգնդապետ Հրաչյա Խոստեղյանը և ենթասպա Գագիկ Մկրտչյանը։
Հուլիսի 23-ին զինված խումբն ազատ է արձակել վերջին 4 պատանդներին, այդ թվում` ՀՀ փոխոստիկանապետ, գեներալ-մայոր Վարդան Եղիազարյանին և Երևանի փոխոստիկանապետ Վալերի Օսիպյանին:
