ԵՐԵՎԱՆ, 26 հուլիսի — Sputnik. Ազգային անվտանգության ծառայությունը հայտարարում է, որ այսուհետ ստիպված է լինելու ձեռնարկել ավելի կոշտ միջոցներ՝ ՙՍասնա ծռեր՚ խմբի կողմից հանցանքների կատարումը կանխելու և խափանելու նպատակով:
«Զինված խմբի անդամների՝ հետզհետե ավելի վտանգավոր դարձող հանցավոր վարքագիծն անցնում է բոլոր սահմանները, որոնցում հնարավոր է դրսևորել ողջամիտ զսպվածություն,- ասված է ԱԱԾ հաղորդագրության մեջ։- Լավատեղյակ լինելով հանցավոր խմբի անդամների մտադրություններին և նախապատրաստած հանցավոր արարքներին, զգուշացնում ենք, որ մարդկանց կյանքին և առողջությանը սպառնացող բոլոր վտանգներն անհապաղ չեզոքացվելու են պատասխան իրավաչափ գործողություններով»:
Ասվածը հիմնավորելու համար ԱԱԾ-ն նաև ՙՍասնա ծռերի՚ անդամների զրույցի ձայնագրությունն է հրապարակել՝ նշելով, որ այն ձեռք է բերվել օրենքով սահմանված կարգով:
