ԵՐԵՎԱՆ, 26 հուլիսի — Sputnik. Ոստիկանության պարեկապահակային ծառայության գունդը գրոհած «Սասնա ծռեր» զինված խումբը ներկա պահին ապահովված է սննդով, Sputnik Արմենիային ասաց ՀՀ ոստիկանության մամուլի ծառայության ղեկավար Աշոտ Ահարոնյանը։
«Սնունդ ունեն», — ասաց Ահարոնյանը` չպարզաբանելով, թե նրանք որտեղից են սնունդ ստանում։
«Սասնա ծռերի» հայտարարության մեջ նշվում է, որ ոստիկանները կրակ են բացել սնունդ տեղափոխող տղամարդու մեքենայի ուղղությամբ, սակայն նա «ոչ մի վնասվածք չի ստացել և բարեհաջող կերպով սնունդը տեղ է հասցրել»։
Ահարոնյանը որևէ կերպ չմեկնաբանեց նաև այս հայտարարությունը։
Ոստիկանությունը հրապարակել է հուլիսի 26-ի գիշերը ՊՊԾ գնդի տարածքում տեղի ունեցած միջադեպի տեսագրությունը։
Հիշեցնենք, որ հուլիսի 17-ի վաղ առավոտյան «Սասնա ծռեր» զինված խմբի անդամները մուտք են գործել ՀՀ ոստիկանության պարեկապահակային ծառայության գնդի տարածք ու պատանդ վերցրել ոստիկանության ծառայողներին։ Զինված հարձակման նախաձեռնողները պահանջում են ազատ արձակել «Հիմնադիր խորհրդարանի» համակարգող Ժիրայր Սեֆիլյանին, ինչպես նաև պահանջում են Հայաստանի իշխանությունների հրաժարականը։
Գրոհի ժամանակ սպանվել է ոստիկանության գնդապետ Արթուր Վանոյանը, վնասվածքներ են ստացել ոստիկանության գնդապետ Արամ Հովհաննիսյանը, փոխգնդապետ Հրաչյա Խոստեղյանը և ենթասպա Գագիկ Մկրտչյանը։
Հուլիսի 23-ին զինված խումբն ազատ է արձակել վերջին 4 պատանդներին, այդ թվում` ՀՀ փոխոստիկանապետ, գեներալ-մայոր Վարդան Եղիազարյանին և Երևանի փոխոստիկանապետ Վալերի Օսիպյանին:
