ԵՐԵՎԱՆ, 26 հուլիսի — Sputnik. Երեկ երեկոյան Ոստիկանության բացած կրակի հետևանքով հրազենային վիրավորում ստացած Աշոտ Պետրոսյանին և Հովհաննես Հարությունյանին գիշերը վիրահատել են: Նրանք երկուսն էլ միջին ծանրության վնասվածքներ ունեն: Այս մասին լրագրողներին հայտնեց «Էրեբունի» հիվանդանոցի ինտենսիվ թերապիայի բաժանմունքի գիտական ղեկավար Հարություն Մանգոյանը:
Բժշկի խոսքով` զինյալներից մեկն ունի կույր, մյուսը՝ թափանցող վնասվածք:
«Սասնա ծռեր» խմբի երկու անդամներն էլ այժմ վերակենդանացման բաժանմունքում են:
Ըստ Մանգոյանի` «Սասնա ծռեր» խմբի անդամ Թաթուլ Թամրազյանի վիճակը շարունակում է ծանր մնալ։ Թամրազյանը ծանր հրազենային վիրավորում էր ստացել հուլիսի 17-ին ոստիկանության ՊՊԾ գունդը գրոհելու ժամանակ։
«Թամրազյանը վերակենդանացման բաժանմունքում է, ընթացիկ հետազոտությունների փուլում, կայուն ծանր վիճակում»,-ասաց Հարություն Մանգոյանը։
Նրա խոսքով` եթե վիճակը ծանր է, ուրեմն ինչ-որ չափով կյանքին վտանգ կա։ Մանգոյանը հայտնեց, որ Թամրազյանի գիտակցությունը տեղն է։
