ԵՐԵՎԱՆ, 25 հուլիսի — Sputnik. Խորենացի փողոցում, ՀՀ ոստիկանության Պարեկապահակային ծառայության գնդի շենքին հարակից տարածքում հավաքվածները երթ են կազմակերպել Երևանում: Երթի կազմակերպիչների խոսքով՝ նրանք անցնելու են Խորենացի, Նար-Դոս, Նալբանդյան, Թումանյան փողոցներով դեպի Աբովյան փողոց, այնուհետև Հանրապետության հրապարակով և Տիգրան Մեծ պողոտայով վերադառնալու են Խորենացի փողոց։
Երթի մասնակիցներին ուղեկցում են ոստիկանները։
Հիշեցնենք, որ հուլիսի 17-ի վաղ առավոտյան «Սասնա ծռեր» զինված խմբի անդամները մուտք են գործել ՀՀ ոստիկանության պարեկապահակային ծառայության գնդի տարածք ու պատանդ վերցրել ոստիկանության ծառայողներին։ Զինված հարձակման նախաձեռնողները պահանջում են ազատ արձակել «Հիմնադիր խորհրդարանի» համակարգող Ժիրայր Սեֆիլյանին, ինչպես նաև պահանջում են Հայաստանի իշխանությունների հրաժարականը։
Գրոհի ժամանակ սպանվել է ոստիկանության գնդապետ Արթուր Վանոյանը, վնասվածքներ են ստացել ոստիկանության գնդապետ Արամ Հովհաննիսյանը, փոխգնդապետ Հրաչյա Խոստեղյանը և ենթասպա Գագիկ Մկրտչյանը։
Նախօրեին ՊՊԾ գնդի տարածք մտած զինված խումբն այրել է գնդի ծառայողական մեքենաներից մեկը և վառվող մեքենան դուրս բերել փողոց: «Հիմնադիր խորհրդարանի» անդամ Ալեք Ենիգոմշյանը հայտարարել է, որ մեքենան այրելը բողոքի նշան էր, քանի որ զինյալներին զրկել են ուտելիքից, բժշկական օգնությունից, անջատել են գնդի էլեկտրամատակարարումը։ Այդուհանդերձ, ըստ նրա, բանակցությունները շարունակվում են:
Հուլիսի 23-ին զինված խումբն ազատ է արձակել վերջին 4 պատանդներին, այդ թվում` ՀՀ փոխոստիկանապետ, գեներալ-մայոր Վարդան Եղիազարյանին և Երևանի փոխոստիկանապետ Վալերի Օսիպյանին:
Այսօր երեկոյան զինված խումբը այրել է նաև ՊՊԾ գնդի «Շեվրոլե» ավտոբուսը:
