ԵՐԵՎԱՆ, 23 հուլիսի-Sputnik. Ալեք Ենիգոմշյանը Խորենացի փողոցում պահին ընթացող հանրահավաքի ընթացքում հայտարարեց, որ Ժիրայր Սեֆիլյանը չի հրաժարվում իշխանափոխության պահանջից։ Նրա խոսքով` Սեֆիլյանի համար միանշանակ են իշխանափոխության պահանջը, վստահության կառավարության ստեղծումն ու ազատագրված տարածքների հանձնման բացառումը։
«Այս զարգացումների առաջին իսկ օրը Ժիրայր Սեֆիլյանն առաջարկել է իր միջնորդությունը, որպեսզի իրավիճակը հարթվի առանց արյունահեղության։ Հայտարարել է, որ համաձայն է և առաջարկում է հանդիպել Սերժ Սարգսյանի հետ ու խոսել ճգնաժամային իրավիճակից դուրս գալու մասին։ Վիտալի Բալասանյանի ասածն իրականության խեղաթյուրում էր»,-ասաց Ենիգոմշյանը։
Ենիգոմշյանը պատկան մարմիններին կոչ արեց Սեֆիլյանի համար ստեղծել հանրության հետ հաղորդակցվելու հնարավորություն։ Այս դեպքում միայն, նրա խոսքով, Սեֆիլյանի խոսքերը չեն աղավաղվի և հեռախոսակապով նրա ասածը համատեքստից դուրս բերելը վերջնականապես կպարզվի։
