ԵՐԵՎԱՆ, 22 հուլիսի-Sputnik. ՀՀ ազգային անվտանգության ծառայության, ոստիկանության, դատախազության և քննչական մարմինների ղեկավարներն այսօր ՀՀ նախագահին ներկայացրել են ոստիկանության ՊՊԾ գնդի տարածքում տեղի ունեցածի մանրամասները։
Սերժ Սարգսյանին զեկուցել են, որ ՊՊԾ գնդի տարածքում պահվող պատանդներին ազատ արձակելու, զինված խմբի անդամների կողմից զենքը վայր դնելու և իշխանություններին հանձնվելու նպատակով վարվում են ակտիվ բանակցություններ, ձեռնարկվում են իրավիճակից թելադրվող այլ անհրաժեշտ գործողություններ:
«Հայաստանում բռնի ուժով, հարձակումով և պատանդ վերցնելով հարցեր չեն լուծվելու: Մենք դա երբեք թույլ չենք տալու: Այս իրավիճակի հանգուցալուծումը պետք է լինի Հայաստանի և մեր հասարակության, պետության հասունության կարևորագույն քննություն»,- ասել է նախագահը:
Սերժ Սարգսյանն իր խոսքում ոստիկանության պարեկապահակային գնդի տարածքը գրաված զինյալներին հորդորել է ցուցաբերել զսպվածություն, ազատ արձակել պատանդներին եւ վայր դնել զենքը:
Խորհրդակցության ավարտին նախագահը իրավապահ կառույցների ղեկավարներին հանձնարարել է շարունակել իրենց գործունեությունը խստագույն զսպվածությամբ՝ օրենքի շրջանակում, ձեռնարկել հնարավոր բոլոր միջոցները՝ իրավիճակին վերջնական խաղաղ հանգուցալուծում տալու համար:
