ԵՐԵՎԱՆ, 22 հուլիսի-Sputnik. Ժուռնալիստների միության նախագահ Աստղիկ Գևորգյանը հարցադրում է անում` մի՞թե մեզ այնպես ենք կորցրել, որ չենք կարողանում որոշում կայացնել, մի՞թե երկու կողմը` զինված խումբն ու իշխանությունը, չունեն այնքան քաղաքական կամքի ուժ, որ նստեն մի սեղանի շուրջ ու բանակցեն։
«Մենք զրկված ենք մի կաթիլ արյուն թափելու բարոյական իրավունքից։ Կուզեմ, որ էյֆորիկ վիճակներում գտնվող մեր փառահեղ ազատամարտիկները մի քիչ սթափվեն, ողջամիտ լինեն ու մտածեն` ինչու են պատանդ վերցնողի անուն վաստակում։ Երկու կողմում մեր հայրենակիցներն են, բոլորի համար ցավում ենք։ Թողած թշնամուն՝ եղբայրասպա՞ն եք ուզում դառնալ»,-խոսքը կրկին հարցադրումով ավարտեց Աստղիկ Գևորգյանը։
Ըստ նրա, այն հանգամանքը, որ Ադրբեջանում թուրքական ռազմաբազա կառուցելու մտադրություն կա, արդեն իսկ պետք է համախմբի մեր ժողովրդին, ու մարդիկ զերծ մնան ներքաղաքական պայքարից։
Հասարակության մեջ ժամանակ առ ժամանակ տեղի ուենցող պոռթկումները, ըստ Կոմպոզիտորների միության նախագահ Արամ Սաթյանի, պետք է մտածելու տեղիք տային իշխանությանը ու ժամանակին կանխվեին։ Հիմա նա տեսնում է մի վիճակ, երբ մարդկանց համբերության բաժակը լցվել է։
«Պետք է ժամանակին փոխվեր չինովնիկների վերաբերմունքը հասարակ քաղաքացիների նկատմամբ։ Ես չեմ էլ կարծում, որ զինված պայքարն էր ճիշտ ճանապարհը։ Փոխզիջումների և հանդուրժողականության մթնոլորտ պետք է լինի, ներողամիտ լինենք իրար նկատմամբ»,-ասաց Արամ Սաթյանը։
Խոսքի իրավունք վերցրեց Կինեմատոգրաֆիստների միության նախագահ Ռուբեն Գևորգյանցը, ասելով, որ ճանաչում է ինչպես «Սասնա ծռեր» խմբավորման որոշ անդամների, այնպես էլ ոստիկաններից շատերին։ Բոլորին համարում է գիտակից մարդ ու հույս ունի, որ հետ կկանգնեն բռնած ճանապարհից։
«Համոզված եմ, որ ոստիկանությունն էլ չի ուզում ընկնել այս պատմության մեջ։ Այս բախումը ձեռք է տալիս միայն մեր թշնամիներին։ Այն մահը, որը, ցավոք սրտի, եղավ, համոզված եմ, որ միտումնավոր չի արվել։ Պետք է հասկանալ նաև, որ Հայաստանն այլևս չի կարող գնալ այն նույն ճանապարհով, որն ընտրել է 25 տարի»,-ասաց Գևորգյանցը։
Ասուլիսի բոլոր մասնակիցները վերջում լրագրողներին կոչ արեցին գրիչն օգտագործել հանդուրժողականության կոչ անելու համար։
