ԵՐԵՎԱՆ, 22 հուլիսի- Sputnik. Ռուսաստանցի աթլետներին օլիմպիական խաղերից զրկելու մասին Լոզանի սպորտային վճռաբեկ դատարանի որոշումը Sputnik Արմենիայի հետ զրույցում մեկնաբանել է Աթլետիկայի Հայաստանի ֆեդերացիայի նախագահ և Եվրոպայի ռեկորդակիր Ռոբերտ Էմմիյանը:
«Անկասկած, սպորտը պետք է մաքուր լիներ և բոլոր մարզիկներն ու մարզիչները պետք է հասկանան, որ սպորտային նվաճումների անհրաժեշտ է հասնել միայն ազնիվ պայքարում: Դոպինգ օգտագործած կամ օգտագործող մարզիկների համար այս որոշումը դաս կլինի: Բայց կա նաև հարցի հակառակ կողմը: Ինչու՞ պետք է այս որոշումից տուժեն այն մարզիկները, որոնք մեծ նվաճումների հասել են առանց դոպինգի և ընդհանրապես չեն օգտագործել խթանիչներ»,- ասել է Ռոբերտ Էմմիյանը:
Նրա խոսքով, Ռուսաստանի հավաքականի կազմում կան շատ աթլետներ, որոնք մեծ նվաճումների են հասել ազնիվ պայքարում և հիմա ուրիշների պատճառով տուժվելու են ու չեն կարողանալու մասնակցել օլիմպիական խաղերին:
Ռոբերտ Էմմիյանը համոզված է, որ ռուս աթլետների բացակայությունը իր հետքն է թողնելու օլիմպիական մրցաշարի վրա եւ ափսոսում է, որ աշխարհահռչակ շատ մարզիկներ բացակայելու են:
