ԵՐԵՎԱՆ, 21 հուլիսի-Sputnik. Հուլիսը հարուստ է բասկետբոլային իրադարձություններով: Տղամարդկանց Հայաստանի հավաքականը, առաջին անգամ մասնակցելով փոքր երկրների Եվրոպայի առաջնությանը, դարձավ չեմպիոն, իսկ մինչև 18 տարեկան բասկետբոլիստուհիների Հայաստանի հավաքականը հաղթական մեկնարկը շարունակեց՝ Վրաստանի մայրաքաղաք Թբիլիսիում Եվրոպայի C դիվիզիոնի մարզուհիների մրցաշարում նույնպես անգերազանցելի մնալով:
Մինչև 18 տարեկան բասկետբոլիստուհիների Հայաստանի հավաքականի գլխավոր մարզիչ Վահագն Հարությունյանը նշեց. «Ես հավատում էի այս հաղթանակին, հաշվի առնելով մեր թիմի իրական հնարավորությունները: Մեր հավաքականի կորիզը կազմում են տեղաբնակ մարզուհիները, երեք անդամ ունեինք Ռուսաստանից և Աննա Ասլանյանն էլ՝ Սիրիայից: Մենք կարողացել ենք շատ լավ թիմ հավաքել, որը նման է ընտանիքի ու հենց դրա շնորհիվ էլ հասանք հաջողության»:
Վահագն Հարությունյանը հայտնեց, որ «Ուրարտու» բասկետբոլային ակումբը ու տղամարդկանց հավաքականը մասնակցելու են Ռուսաստանի առաջնությանը: Դա հնարավորություն կտա մասնակցելու Ռուսաստանի պատանեկան առաջնությանը:
Անգելինա Մանուկյանը նշեց, որ առանց բասկետբոլի իրեն չի պատկերացնում, իսկ Աննա Ասլանյանը հույս հայտնեց, որ հետագայում նույնպես հաղթանակներ կունենան։
Հավելենք, որ Աննա Ասլանյանը ընդամենը 15 տարեկան է, սակայն պատանի հայ բասկետբոլիստուհուն դա չխանգարեց փայլել մինչև 18 տարեկանների Եվրոպայի առաջնությունում։ Մեր մարզուհին տեղ գտավ նաև առաջնության խորհրդանշական հինգ բասկետբոլիստուհիների մեջ:
