ԵՐԵՎԱՆ, 21 հուլիսի — Sputnik. Ռուբեն Բաբայանը, անդրադառնալով Ժիրայր Սեֆիլյանին ուղղված մտավորականների նամակին, որի տակ ստորագրել է նաև ինքը, նշեց, որ պատրաստ է ստորագրել ցանկացած նամակի տակ, որը կարող է կանխել արյունահեղությունը՝ անկախ այն բանից, թե ում այն ուղղված կլինի:
«Ես այնքան ռոմանտիկ չեմ, որ կարծեմ, թե նամակը միանգամից փայլուն դերակատարույուն կունենա, բայց եթե մի փոքր շանս կա, պետք է օգտագործել։ Այնպես որ միայն Սեֆիլյանին չեմ դիմում, ես դիմում եմ նաև մյուս կողմին՝ իշխանությանը, որը պետք է անպայման ռացիոնալ ելք գտնի»,- ասաց Բաբայանը։
Բաբայանը համոզված է, որ մտավորականների բոլոր ուժերը պետք է ուղղված լինեն հնարավոր նոր արյունահեղությունը կանխելուն՝ անկախ նրանց ունեցած քաղաքական հայացքներից:
«Անկախ նրանից, թե ինչ է կատարվել, ես չեն կարծում, որ որևէ մի կողմը շահագրգռված է, որ լինեն նոր զոհեր: Սա արդեն նշանակում է, որ կա մեկ ընդհանուր նպատակ: Իսկ եթե կա ընդհանուր նպատակ, ուրեմն հնարավոր է եզրեր գտնել: Եզրեր, որոնք չեն բերի մի իրավիճակի, երբ մեկը հաղթել է, մյուսը՝ պարտվել»,- ասաց է Բաբայանը:
Միաժամանակ մտավորականն ընդգծեց, որ երկիրը ճգնաժամային վիճակում է, ուստի ստեղծված իրավիճակի հանգուցալուծմանը պետք է մասնակցեն բոլոր պետական կառույցները, այլ ոչ թե միայն Ոստիկանությունն ու ԱԱԾ-ն:
«Մենք պետք է հասկանանք, որ եթե պահենք մեր երկրում նույն համակարգը, նման հրաբուխներ, գուցե ավելի դաժան, ավելի անկանխատեսելի, ժամանակ առ ժամանակ տարբեր տեղերից պայթելու են։ Մենք պետք է թույլ տանք, որ մեր երկրում բարեփոխումները, իշխանափոխությունը, առաջընթացը տեղի ունենան խաղաղ ճանապարհով: Հակառակ դեպքում մենք գնում ենք ինքնասպանության»,- ասաց նա:
Իսկ իբրև հանգուցալուծում` Ռուբեն Բաբայանն առաջարկում է «Սասնա ծռեր» խմբի անդամներին ուղարկել Ղարաբաղ՝ հիշեցնելով, որ պատերազմական դրության մեջ գտնվող երկրներում ընդունված է հանցանք գործած անձանց պատերազմ ուղարկել:
Մի խումբ հայ մտավորականներ նախօրեին ստորագրահավաք են անցկացրել` հորդորելով Ժիրայր Սեֆիլյանին, որպեսզի նա իր ընկերներին զենքը վայր դնելու և իրավապահներին հանձնվելու կոչ անի։
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։ ՀՀ իրավապահ մարմինների աշխատակիցները բանակցում են զինված խնբի անդամների հետ։
