ԵՐԵՎԱՆ, 21 հուլիսի — Sputnik. Խորենացի փողոցում տեղի ունեցած բախման հետևանքով տուժած և բուժհաստատություններ դիմած 51 քաղաքացիներից 29-ը ոստիկաններ են, հայտնեց Արմեն Մուրադյանը։
Նա անդրադարձավ «Սասնա ծռեր» խմբի անդամներից մեկի այն հայտարարությանը, թե իրենք զրկված են շտապ բուժօգնությունից։
«Բուժօգնությունը որևէ մեկին անհասանելի չի լինի անհրաժեշտության դեպքում»,-ասաց Մուրադյանը։
Լրագրողներից մեկի հարցին, թե զինված խմբի անդամներից մեկի հղի կինն ի՞նչ վիճակում է, Մուրադյանը պատասխանեց.
«Առանձնակի տեղեկություն կապված որևէ մեկի կնոջ հետ չունեմ»։
Գիշերը ոստիկանների և ցուցարարների բախման հետևանքով տուժածները տեղափոխվել են հիմնականում «Էրեբունի», «Գրիգոր Լուսավորիչ», «Հերացի», «Երևան», «Արմենիա» բժշկական կենտրոններ։ Ոստիկանությունը հուլիսի 20- լույս 21-ի գիշերն առավոտյան ժամը 4։30-ի սահմաններում հատուկ գործողություն իրականացրեց Քրիստափորի և Խորենացու փողոցների խաչմերուկում և րոպեների ընթացքում ցրեց ցույցը։ Մինչ այդ հուլիսի 20-ի երեկոյան բախում տեղի ունեցավ ոստիկանության և ցուցարարների միջև։ Իրավիճակը սրվեց այն բանից հետո, երբ ցուցարարները պահանջեցին լուծել ներսում գտնվող անձանց սննդի խնդիրը։ Հետո Նրանք քարեր նետեցին ոստիկանների վրա, նրանք էլ պատասխանեցին լուսաձայնային և ծխային նռնակներով։
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։ ՀՀ իրավապահ մարմինների աշխատակիցները բանակցում են զինված խնբի անդամների հետ։
