ԵՐԵՎԱՆ, 21 հուլիսի-Sputnik. Կարկտահարության ու հորդառատ անձրևների հետևանքով տուժել են Գեղարքունիքի, Շիրակի, Կոտայքի, Սյունիքի ու Արմավիրի մարզերի բնակավայրերը։
Մասնավորապես` վնասվել են բնակելի տներ, օժանդակ շինություններ, գյուղամիջյան ճանապարհներ ու կամուրջներ։ Այս ամենի փոխհատուցման համար, օրինակ, Արմավիրի մարզի մի շարք համայնքների բնակիչներին աջակցելու նպատակով տրամադրվելու է 21 միլիոն 875 հազ. դրամ, Շիրակի մարզի Արթիկ համայնքի բնակիչներին էլ՝ 3 միլիոն 800 հազ. դրամ:
«Հորդառատ անձրևների պատճառով Գեղարքունիքի մարզում եղել են անանցանելի ճանապարհահատվածներ` 7 կմ երկարությամբ մարզային նշանակության ճանապարհներ։ Տեղում կատարված ուսումնասիրությունից պարզվել է, որ նշված ճանապարհների անցանելիությունն ապահովելու համար անհրաժեշտ է իրականացնել հողային պաստառի վերականգնման և առանձին հատվածներում ջրահեռացման առուների ակոսահանման աշխատանքներ»,-ասաց Դավիթ Լոքյանը։
Սյունիքի մարզի Կապան համայնքի վնասված ճանապարհների վերականգման համար կառավարությունից պահանջվում է 55 միլիոն դրամ։
Նախարարը տեղեկացրեց, որ կա վարչապետի հատուկ հանձնարարական, ըստ որի` բանկերը կարող են սկսել վարկերի հետաձգման հետ կապված գործունեություն։
